Shillong, Nailar 08
Ka lympung ïalehkai ASMITA Wushu League East Zone kan sdang naduh ka Sngi Thohdieng ha Indoor Stadium jong ka NEIGRIHMS ka ban wan ïashim bynta kumba 550 ngut ki nongïalehkai Wushu ha ka kyrdan ïalehkai Sub-Junior, Junior bad Senior.
Ïa kane ka lympung yn pynlong da ka Meghalaya Wushu Association ha ryngkat ka jingkyrshan lang da ka tnat ïalehkai jong ka Sorkar Pdeng lyngba ka Sports Authority of India (SAI).
Ka kyntien jong ka ASMITA ka mut “Achieving Sports Milestone by Inspiring Women through Action”. Kane ka lympung ka tyrwa ïa ka khusnam kaba kongsan da T.7.2 lak ban pynshlur bad ithuh ïa ka jingtrei shitom ki nongïalehkai. Ki nongïalehkai shimet kiba don ha ka thup kaba phra ki don hok ban ïohpdiang ïa kane ka khusnam. Da ka jingthmu ban ithuh bad pynroi ïa ki sap ïalehkai jong ki samla, ka ASMITA Wushu League ka thmu ban pynkhlaiñ ïa ka jingroi jong kane ka jingïalehkai ha kane ka thaiñ.
Ha kane ka samoi, la lah ban pyndep ïa kane ka lympung ha South bad North Zone. Ka West Zone kan sdang hadien ba la dep ka East Zone. Ïa ka nongbah Shillong la tip ïa ka namar ka jingitynnad jong ka mariang bad ka kolshor kaba ai ïa ka jaka kaba biang bha na ka bynta kane ka jingïalehkai kaba phylla. La khmih lynti ba kane ka lympung kan khring ïa ki nongïalehai ba kin wan ïashim bynta bad ruh ïa ki nongpeitkai ba kin wan ban sakhi da la ki jong ki khmat.
