Shillong, Nailar 08
Ki trai bad nongñiah kali jong ka Hima Mylliem bad Hima Khyrim kiba kit maw bad shyiap kiba don hapoh ka lama jong ka Local Truck Owner and Driver Association, East Khasi Hills District hapoh ka jingïalam jong u President, u Bah Egenstar Kurkalang ka la pynlong ïa ka jingïalang ha ka 8 tarik u Nailar 2024, ban ïamir jingmut halor ka jingshah khang ki kali kit mar kit shyiap nalor ka jingbym pynshai ka Sorkar ha kaba ïadei bad ka jingpyntreikam ïa ka Meghalaya Mineral (Prevention of Illegal Mining Transportation and Storage) Rules, 2022.
La pynlong ïa katei ka jingïalang ha ka shnong Umphyrnai ha ryngkat ka jingwan ïashimbynta da ki nongñiah bad ki trai kali kiba kit maw bad shyiap na ki distrik bapher-bapher ha kaba la shim ruh ïa ka rai ban kamai beit bad kin nym treh da lei-lei ban siew ïa ka ‘Challan’ kumba la bthah da ka tnad Khlaw jong ka Sorkar Jylla.
Haba ai jingkren ha katei ka jingïalang, u Bah Egenstar Kurkalang, u la ong ka rai ba ka Association ka la shim ha katei ka jingïalang ka long ba kan pyrshah ïa ka jingpyntreikam jubor jong ka Sorkar ïa katei ka kyndon namar haduh mynta ka kynhun kam pat ïoh satia kano-kano ka jingpynshai halor kane ka kyndon.
“Ym dei ba ngi pyrshah ïa ka kyndon hynrei ngi pyrshah ïa ka rukom pyntreikam ha kaba hangne hapoh ka Jylla jong ngi, lada bud thik kum kato ka kyndon ba ki la shna, ka la long kumba pynduh ja ïa u baduk-basuk ha kane ka thaiñ jong ngi khamtam”, la ong u Bah Egenstar.
U Bah Egenstar u la ong ba lada ailad ïa ka Sorkar ba kan shna aiñ bad kyndon katba ka mon khlem ka jingshim lem ïa ka jingai jingmut ne ka jingïasnoh kti lang bad ki trai bad nongñiah kali, kan wanrah ka jingjia kumba jia ïa u dewïong ha kaba ki barit-baria kin long tang kum ki nongkhrong ne ki mraw jong kito kiba don ïa ka spah ka phew.
U la ong ba ka jingshim dor rem jong ka Sorkar ïa ka ‘Challan’ kaba kum ki nongñiah bad ki trai kali kiba kit maw bad shyiap kin hap siew, ki la ong pynban ha ka kyrteng jong ka mariang ban ïada bad kane ka long kaei-kaei kaba ym lah long satia.
“Katkum ki kyndon bad ki rukom ba ki la buh kam dei ban ïada ïa ka mariang hynrei ka dei pynban tang kum ka jingshim khajna na ngi”, la ong u Bah Egenstar.
Shuh shuh u Bah Egenstar u la ong ba ka Association kan nym treh da lei-lei ban shim ïa ka ‘Challan’ namar ba ïa u maw bad shyiap la kamai tang hapoh kane ka jaka Meghalaya ym ba ki shalan shabar ka Jylla.
Na ka liang ka Association ha kane ka sngi ka la shim ruh ïa ka rai ban leit ïakynduh ïa u Myntri Rangbah ka Jylla, u Conrad K. Sangma ban ïakren bad ïathir sani bha ha kaba ïadei bad kane ka kyndon bad dawa ruh ban pynjynsur ïa ki kyndon jong katei ka Rules.
