Shillong, Nailar 08
Ka khlur nongïalympat ka ri ka Vinesh Phogat ha ka Sngi Palei ka la pynbna ban shongthait noh na ka kam ïalehkai. Kane ka la wan hadien shisngi ba ka la shah pynduh noh na ka jingïakhun ban ïaknieh ïa ka takma ksiar ha ka kyrdan ïalehkai 50 kg jong ki kynthei ha ka Paris Olympics 2024.
Kane ka nongïalehkai 29 snem ka rta, kaba la long kaba nyngkong eh na ki kynthei jong ka ri ban poi sha ka phainal ha ka Olympic bad ka dang sah sa tang shisien ïakhun ban ïoh ïa ka khusnam ksiar hadien ba ka la lah ban pynpaw ïa ka jingtbit ha kane ka jingïalehkai ha shwa ba kan jam sha ka final. Hynrei ka la shah weng hadien ba la thew biang ïa ka jingkhia ha ka step jong ka Sngi Balang bad ka la tam palat ïa ka 100 gram.
Haba pynbna ïa kane ka rai shongthait, ka la ong da kaba ka la thoh ha ka rynsan X ha ka ktien Hindi, “Ma Kusti (Mei, Jingïalehkai Lympat) ka la jop pyrshah ïa nga, nga la rem. Map ïa nga, ka jingphohsniew jong phi bad ka jingshlur jong nga ka la dkut noh. Ngam don bor shuh mynta .”
“Khublei ïa ka jingïa-lehkai ïalympat 2001-2024”, ka la bynrap ha ka jingthoh.
Ka Vinesh ka la jop ïa ka jingïakhun semi-final da 5-0 kol pyrshah ïa ka nongïalehkai pyrshah jong ka kaba na ka Cuba, u Yusneylis Guzman Lopez, kaba la wan bujli ïa ka ha ka jingïakhun kaba khatduh – bad ha kaba kut ka la ïoh ban khur ïa ka takma rupa. Ka Sarah Hildebrandt kaba na America ka la khur ïa ka takma ksiar hadien ba ka la jop ïa ka nongïalehkai kaba na Cuba da 3-0.
Ka Vinesh ka la ujor sha ka Court of Arbitra -tion for Sport (CAS), da kaba pan ïa ka takma rupa (joint silver medal) na ka bynta kane ka jingïalehkai. Katei ka nongïalehkai ba dang 29 snem ka rta na Haryana ka dei ka nongïalehkai Olympic la lai sien, ha kaba ka la ïakhun ha ki lai tylli ki kyrdan jingkhia bapher bapher ha baroh lai tylli ki jingïalehkai. Katba ha ka Rio Olympics ha u snem 2016, ka la ïakhun ha ka kyrdan kaba 48 kg, ha ka Tokyo Games, ka Vinesh ka la ïakhun ha ka kyrdan kaba 53 kg.
Ka la khur lai tylli ki takma ksiar ha ki lai tylli ki Commonwealth Games, ha u snem 2014, 2018 bad 2022, ha ki lai tylli ki kyrdan jingkhia bapher bapher.
Ka Vinesh ka la long ruh ka nongïalehkai kynthei ba nyngkong eh na India ban khur ïa ka takma Ksiar ha ka Commonwealth Games bad Asian Games ha u snem 2018. Ka la ïoh ruh ban khur ar tylli ki takma rnong ha ka World Wrestling Championship ha u snem 2019 bad 2022.
