Shillong, Nailar 08
Sa shisien pat ka Christian Higher Secondary School ka la lah ban pyni ïa ka jingkhlaiñ bor na ka bynta ban pynjem khnap sa ïa ka kynhun na Punjab haduh shi dorjon (12-0 kol) na ka bynta ban jam sha ka quarter final ha ka Subroto Cup International Football Tournament 2024 ha ka Sngi Palei ha ka nongbah Delhi.
Kane ka kynhun ki ‘thei ïalehkai Under-17 na Pahamsyiem Nongpoh, ka la ïoh ban lamkhmat na ka Group-D ha kaba ka la ïoh 9 point na ki lai sien ïakhun. Kumta kane ka kynhun kan pynkhreh ïa ka jingïakhun quarter final pyrshah ïa ka Manipur ha ka Sngi Saitjaiñ.
Haba phai sha kane ka jingïakhun baroh ar kynhun ki la pyrshang ban ïakhun tyngeh naduh kaba sdang. Dei ka Christian kaba la lah ban pyni ïa ka jingkhlaiñ bor ha kaba ka Pynibha Rangthaluh ka la ïoh ïa ar tylli ki hat-trick da kaba ïoh thep haduh hynñiew kol. Katba, ïa kiwei pat ki kol la pynbud da ka Susimery Lyngdoh Peinlang, Rimika Khongkai, Daïamon Makhroh, Evamary Myrthong bad ka Barikor Kurbah.
Kham ha shwa, kane ka kynhun ïalehkai na ka Jylla hapoh ka jingïalam ka Kong Ïaikyntiew Nongkynrih ka la lah ban pynliem nyngkong eh ïa ka Indian Public School Conference (IPSC) da 10-1 bad hadien ïa ka Maharashtra da 1-0 kol.
