Shillong, Nailar 09
U Myntri Rangbah ka Assam, u Himanta Biswa Sarma, ha ka Sngi Palei, u la kynnoh ïa kawei ka skulbah shimet kaba don ha Meghalaya, ba ka la leh ïa kata ka “Flood Jihad” da kaba pynjulor ïa ki lum ha ka shlem jong ka ban shna ïa ki jingtei bathymmai, kaba u la kam ba ka la wanrah ïa ka jingtuid bad jinglang um kaba jur ha Guwahati.
U Sarma u la kdew kti ïa ka University of Science and Technology Meghalaya (USTM), kaba la seng da u Mahbubul Hoque uba dei ruh u Chancellor jong ka.
Haba kren ha ka jingïakynduh bad ki nongthoh khubor ha nongbah Guwahati, u Sarma u la kam ba katei ka skulbah ka la pynjulor ïa baroh ki lum kiba don ha ka jaka pule jong ka ban tei ïa ki ïing thymmai na bynta ban sdang ïa ka Medical College bad kata ka dei “kawei na ki daw” jong ka jingtuid bad jinglang um sha Guwahati.
“Nga sngew ba u trai jong ka USTM u la sdang ïa ka Jihad jong ka jingshlei um. Ym don ki briew kiba ieit ïa ka mariang kiba pynjulor ïa ki khlaw bad ki lum khlem jingsngewsynei. Mynta, lah ban tei ïa ki ïing ha ki lum da ka jingpynwandur kaba biang,” u la bynrap.
Ka USTM ka don ha ka thaiñ 9th Mile ha Ri-Bhoi jong ka jylla Meghalaya bad kam da jngai shuh na ka sor Guwahati.
Ha ka por ba jur u slap ha Guwahati naduh ka Lah Sngi U Blei, ha ki katto-katne ki jaka hajan ka USTM, kum ha Jorabat, kaba dei ka jaka rung jong ka nongbah na ka liang mihngi, ka um kaba la lang ka la pynshlei ïa ki surok bad ka la poi haduh syngkai.
“Ka USTM ka don ha Meghalaya, hynrei 90 percent ki khynnah skul bad ki nonghikai jong ka ki dei na Assam. Lada ki khynnah skul bad ki nonghikai jong ngi ki sangeh ban leit shata, kan sangeh hi dalade ban pynjot ïa ki lum,” la ong u Sarma.
U la ong ba ka sorkar Assam ka la phah jingthoh sha u Myntri Rangbah ka jylla Meghalaya u Conrad K Sangma halor kane ka kam.
Haba kylli la hato ka USTM ka dei tang ma ka kaba donkti ha ka jingshlei um ha Guwahati, u Sarma, pynban, u la ong, “Ka dei kawei na ki daw, ym ka daw bakongsan. Ki briew jong ngi ruh ki donkti ha ki jingtei ha ki nala um.”
U la ong ba ka sorkar ka lah ban pyntuid ïa ka um na Guwahati hapoh 3-4 kynta lada don ka jinglang um, hynrei kan nym lah lada ka USTM kan nang pynjur shuh shuh ïa ka jingeh.
“Lada don u slap ha Guwahati, ngi don ka jingkitkhlieh bad ngi lah ban peit ïa kata. Lada ym don slap ha Guwahati, te ka USTM ka don ka jingkitkhlieh ïa ka jingshlei um ha Guwahati,” la ong u Myntri Rangbah ka Assam.
Haba ïada ïa ka sorkar jong u na ka jingshah kynthoh kaba jur halor ka jingshlei um ha Guwahati, u Sarma bad ki paralok jong u ha ka Kynhun Myntri ki la ju kynnoh ba ka um na Meghalaya ka la pynshlei ïa ka nongbah.
U slap bajur u la lynshop ïa ka Guwahati ha ka Lah Sngi U Blei kaba la wanrah ïa ka jinglang um, bad kaba la pynjynjar ïa ki nongleit-nongwan. La ïathuh ba ki briew kiba wanphai na ki shlem treikam, ki khynnah skul bad wat ki kali kit nongpang ruh ki la sahkut haduh da miet namar ka jingshlei um ki surok.
Ka Gauhati High Court ha ka Sngi Balang ka la ong ba ka por ka la dei ban tuklar ïa ka jingeh jong ka jinglang um ha ka nongbah bad la bthah ïa ka sorkar ba kan shimkhia ban weng ïa kane ka jingeh shi junom, da kaba bthah ban aiti ïa ka saiñdur ban pynduna ïa kane ka jingeh hapoh ka 19 tarik Nailar.
