Shillong, Nailar 09
Ka Meghalaya ha ka wat ba-ar ka la ïoh sa T.2000 klur na ka Tnat Pla Tyngka ka Sorkar Pdeng ban pyntrei ïa ki projek shna surok bad kiwei kiwei ki projek hapoh ka Meghalaya Integrated Transport Project (MITP) namar ka jinglah jong ka Jylla ban pyntreikam bha ïa ki projek ha ka wat banyngkong.
Kane ka jingmang pisa biang ka Sorkar Pdeng ka la wan ruh hadien ka jingpynsngew u Myntri Rangbah ka Jylla, u Conrad K Sangma sha ka Myntri ka tnat pla tyngka ka Sorkar Pdeng ka Nirmala Sitharaman ha ka jingïakynduh ha ka 24 tarik Jylla mynta u snem ha kaba u la ai ka jingbatai kaba ïadei bad ki projek hapoh ka MITP, bad kyrpad ruh ïa ka ban ai jingkyrshan ïa ka Jylla da kaba mang pisa shuh. Ka Sorkar Jylla ka la pynpaw ka jingsngewnguh ïa ka tnat pla tyngka ka Sorkar Pdeng kaba la sngap ban pynurlong ïa ka jingkyrpad jong u Myntri Rangbah ka Jylla ban mang pisa shuh.
Kum ban pynkynmaw, ha ka wat banyngkong, la pyntreikam ïa ka MITP da ka jingkyrshan pisa T.880 klur na ka World Bank ha kaba ki projek shna surok ki kynthup ïa ka surok Bajengdoba-Resubelpara-Mendipathar-Damra, surok Shillong-Diengpasoh bad surok Pasyih-Garampani kiba la pyntrei shaid shaid. Ka jinglah ban pyntrei ïa kine ki projek la ïaroh ruh da ka World Bank bad ka tnat pla tyngka ka Sorkar Pdeng.
Ha ka wat ba-ar jong ka MITP (MEGA Corridor) project, palat 300 Km ki surok kiba ngiam ar tylli ki kali ki ban ïaid ki dei ki surok kiba pynbha ïa ka jingpynïasoh ïa ki jaka ha Shillong, Tura, Jowai bad Dawki.
La ong ba ka jingpynleit jingmut kaba kham kyrpang ka dei ruh ïa ki surok ha sor kiba pynïasoh ïa ka New Shillong Administrative City bad New Shillong Knowledge City, ki ban pynkylla dur ïa ki jaka kum ka Industrial parks, Warehouse, agro-processing center nalor kiwei kiwei ki jingtei jingshna ki ban long ki jingdon jingem kiba neh bad nang pynsted ïa ki kam pynroi bad ki jingpynïasoh.
Kine ki kynthup ruh ïa kiwei ki projek kum ka Shillong-Dawki Corridor (NH 106 & 206), Tura Dalu Road (NH 217), Phulbari sha Goeragre Road (NH 127B), ka jingkieng Dhubro-Phulbari ki ban plie ïa ka Jylla ban ïohi ïa ka jingkylla khamtam ka jingbuhthong lypa ban kynjoh sha ka ïoh ka kot kaba long 10 Billion Dollar ha u snem 2028.
