Tulsa, Nailar:
Ha kawei ka jingjia, la ong ba kawei ka iing kaba don ha nongbah Tulsa jong ka United States ka la kem ding bad pluh tang namar ka jingleit ktha kulmar jong uwei u ksew uba ri ha katei ka iing ia u kynja ‘battery Lithium’ jong u ‘Power Bank’ uba don ha katei ka iing. Kane ka la jia ha u bnai Jymmang bad la sakhi ruh ia katei ka jingjia baroh lyngba ki camera CCTV ba la pyndait ha katei ka iing bad kaba la pyllait hi da ka tnat pylip ding jong ka Tulsa.
Katkum katei ka dur-khih ba la pyllait da katei ka tnat, la iohi ia 2 tylli ki ksew bad kawei ka miaw kiba don ha ka kamra shong kai jong katei ka iing, bad kynsan uwei na kitei ki ksew u la leit tur sha ka jaka ba don utei u battery ‘power bank’ bad u la sdang ban ktha kai bad ban dait kumba ki ksew ki ju sngewtynnad ban lehkai haba ki ioh ia kino-kino ki kynja tiar ba ki sngewtynnad ban ktha. Hynrei kaba pyn- kyndit ka long ba tang da ki sekon, utei u battery u la bthei bad ka ding kaba sied na utei u battery ka la sied ha ki jaiñ bad ki tiar kiba don ha katei ka kamra bad kumta katei ka ding ka la nang heh bad pur haduh ba katei ka kamra ka la pluh syndon baroh kawei.
Wat la katta, la ong baroh 3 tylli kitei ki jing-ri kiba don ha katei ka kamra, ki la lait phet noh kloi shuwa ba katei ka ding kan klang bad baroh 3 tylli ki la lait im khlem kano-kano ka jingmynsaw. Na ka liang ka tnat pynlip ding ruh ka la lah ban poi noh sha katei ka jaka mar-mar khlem da ailad ia katei ka ding ba kan klang bad bam duh ia katei ka iing baroh kawei.
Ka tnat pynlip ding jong ka Tulsa ka la pynpaw ka jingsngewkhia bad ka la maham ruh ia ki paidbah ba ki dei ban phikir bha na kum kitei ki jingjia, namar lada dei ha ka por ba kitei ki trai iing ki dang iohthiah lyngngai ha ka por mynmiet, ym lah shuh ban mutdur la kin dang lait im ne em na katei ka jingjia.
Na ka liang ka tnat pynlip ding jong ka Tulsa Fire Deparment mar ia jia kane ka la phah ia ka jingmaham sha baroh ki paidbah kiba ri jingri ha iing ba kin sumar bad phikir bha ia kum kitei ki jait tiar kiba lah ban wanrah jingma ia ka jingim jong ki briew bad kumjuh ruh ia ki jingri haba ki ioh ktha ne ioh bam kumba long utei u ksew ha kane ka jingjia.
Namar kitei ki jait battery, khamtam ki ‘Lithiumion Battery’ ki dei kiba la shna khnang ba kin lah ban kit shibun ka bording hapoh jong ki bad haba ia katei ka bor-ding kaba don hapoh la pyllait khlem antad, utei u battery un bthei kumba long ha katei hi ka jingjia.
Namar la ong ba ka tnat pynlip ding ka la shem shibun kum kitei ki jingjia ba iadei bad ka jingbthei ki battery ha kylleng jong ka ri.
Kumta, la ong ba lada ki paidbah ki kwah ban lait na kum kitei ki jingjia, ki donkam ban phikir bad husiar bha haba iadei bad ka rukom pyndonkam ne ka rukom buh ia kum kitei ki jait tiar kiba lada ioh ki jingri, ne ki khyllung, kan wanrah jingma ia ka iing- ka sem baroh kawei.
