Shillong, Nailar 09
Ka Khasi Students’ Union (KSU), Mawlai Circle ha ryngkat lang ka Federation of Khasi Jaiñtia and Garo People (FKJGP), Hynñiewtrep National Youth Federation (HNYF) Mawlai Circle, ka khot ka wer ïa phi baroh ki paid nongshong shnong ka Mawlai bad ka bri u hynñiewtrep ban ïa mih lang ha ka lyngkhuh snem ba lai jong i Bah Cherishstarfield Thangkhiew (Bam kwai ha dwar u blei) ha ka 13 tarik u Nailar 2024.
Kane ka jingkynmaw tympang ïa ka lyngkhuh snem ba lai kan long ka jingpynkynmaw bad jingbitar ïa ka jingleh donbor ka Sorkar ban dkhat jubor ïa ka jingim jong i Bah Cherishstarfield Thangkhiew, u sohkhliang, ka jingpait dohnud jong ka ïing ka sem, kan ïai kyrsoi ha ka mynsiem jong ngi iwei-pa-iwei ba da lei-lei ngin nym lah ban pdiang ïa ki kam thombor da ki bor Sorkar ha ka synshar paidbah, ka jingsah umdum haduh mynta, ka jingïaid laitluid ki ‘riewthrang snam da lei lei kan nym pynklet ïa ngi.
Ha katei ka sngi na ka liang ka KSU, FKJGP, HNYF (Mawlai Circle) kin pynlong ka jingwah ïa ki lama ïong (Black Flag) kum ka dak ka jingpyrshah ïa ka jingïaid laitlan ki ‘riewthrang snam naduh ka por 9 baje mynstep bad kumjuh ban synran lang ïa ka ïing ka sem ha ka jingleit buh syntiew kynmaw burom ïa i (Late) Cherishstarfield Thangkhiew ha u Lum Jingtep ha Lawmali ha ka por 2 baje nohphai sngi.
Kumta na ka liang ka KSU, FKJGP bad HNYF Mawlai Circle ki khot ki wer ïa phi baroh ban shim bynta lang ha katei ka sngi. Ka jingshim bynta lang jong phi baroh kan pynpaw ïa ka dak ba da lei-lei ka Ri bad ka Jaidbynriew kan nym pdiang bad kan ïai ïakhun pyrshah ïa ki kam thombor pyrshah ïa la ki paradoh parasnam.
Kane ka long katkum ka kyrwoh ba la pyllait da u samla Biangbor Paliar, President KSU Mawlai Circle bad u samla Khrawkupar Nongsiej, President FKJGP Mawlai Circle.
