Shillong, Nailar 09
Uwei u samla Khasi, 23 snem ka rta, u la mynsaw jur kawei ka khmat hadien ba ki ïit jong ka trok kaba u la ñiah ki la dung hadien ba ka kynhun runar na Guwahati ki la leit thombor ïa ki samla Khasi Pnar kiba ñiah kali ban kit dewbilat na Guwahati sha Lumshnong.
Une u samla u dei ba la tip kyrteng u Joshwa Rymbai na ka Khliehtyrshi, West Jaiñtia Hills District. Ïa mynta ka khmat jong une samla ka don hapdeng ka jingshitom kaba jur hadien ba ki ïit barit kiba la pait na ka ïit jong ka trok namar ka jingbom ki runar ki la rung shapoh ka khmat kadiang.
Kane ka la jia ha ka por 1:00 baje shiteng synñia jong ka 6 tarik u Nailar hadien ba ki trok na Jaiñtia kiba don palat 35 tylli eiei kiba dang leit kit dewbilat na Digaru kaba don hajan jaka sangeh rel. Mar ha kata ka por ka la wan ka kynhun runar ban tied ïa ki kali bad bom ïa ki nongñiah kali kat haduh ba don kiba la mareh kulmar bad don kiba la shah shoh bad mynsaw, bad don kiba la shah tuh ki mobile.
Katkum ka jingïathuh ki bahaïing, u Joshwa u la mynsaw jur na ka khmat ka dei namar u dang ïohthiah bad ka ‘phone’ jong u ka sniew dei ha kane ka por kita ki runar kiba la kawang maw ïa ka ïit bad ki ïit kiba la pait ki la rung beit sha ki khmat jong u.
Hadien ba la jia, kumta u la mareh kulmar ban wad jingïarap bad poi ha kawei ka petrol pump kaba dei shipara jong u trai ba pynïaid ïa ki kali ha Assam.
Haba la wan kit sha Civil Hospital Shillong ym lah ban sumar hynrei la phah sha NEIGRIHMS Hospital Mawdiangdiang bad mynta ki doktor kim lah ban sumar ki la phah ban leit sumar noh sha Guwahati.
Na ka liang ki bahaïing ki la pynpaw ïa ka jingeh namar ki dei na ka longïing baduk ban leit phah sumar shaduh Guwahati hynrei lada kim leit ruh kane ka khmat jong u Joshwa kan sa sniew bad kan ktah ruh sa ïa kawei ka khmat kamon.
Da ka jingshah shoh kine ki samla Pnar haduh mynta kam pat shngaiñ ïa ki nongñiah trok ba kin leit sha Guwahati namar ïoh ki shah pyndik biang ha ka por ba ki dang ïeng ap pali ban kit ïa ki mar.
