Tura, Nailar:
Ki kynhun seng bapher-bapher jong ka West Garo Hills ki la ai por haduh ka 16 tarik Nailar ïa ka tnad pulit ban kem ïa uba shah kynnoh donkti thombor ïa kawei ka khynnah (hapoh 18 snem) – ha ka jingjia kaba la jia ha ka 2 tarik mynta u bnai.
Kitei ki kynhun seng ba kynthup ïa ka GSU, FKJGP, AYWO, ADE, APA bad AHAM ki la phah ïa ka jingujor sha u Superintendent of Police, West Garo Hills ban dawa kem mardor ïa uba shah kynnoh donkti ha katei ka kam.
Katkum ka jingujor ba la ujor da kitei ki kynhun seng, katei ka jingjia ka la jia ha ka 2 tarik Nailar ha kaba ki nongshong shnong ki la lap ïa kawei ka lanot ba dang hapoh 18 snem ka rta (kaba don ha ka ‘uniform’) ha ka rukom ka bym ïahap ha ka kudam jong ka dukan ba la long trai da utei uba shah kynnoh donkti.
Ka ejahar, katkum ka jingbatai ka lanot, la ujor ha katei ka por ha Garobadha Investigation Centre. Hynrei, namar ka jingbym kem ïa uba sha kynnoh donkti wat hadien 5 sngi, ki kynhun seng lem bad ki nongshong shnong ki la pynpaw ïa ka jingbym hun haba ïadei bad ka jingtohkit.
Katei ka kynhun ka la kynnoh ruh ïa u ‘Investigating Officer’ halor ka jingbym shimkhia ïa katei ka kam wat la ka ‘mobile phone’ jong uba shah kynnoh donkti ka dang meh sah hynrei kam shym la don kano-kano ka jingpyrshang ban lap dien ïa u.
Katkum ka jingujor, ïa ka kopi jong ka ejahar ym shym la ai sha ki bahaïing jong ka lanot ne ïasam ruh ïa ki jinglap na ka kaiphod eksamin (medical report) sha ki. La kynnoh ruh ba haduh mynta, kam shym la don kano-kano ka jingïasyllok kaba la ai sha ka lanot na ka liang ka DCPO.
Haba maham ba ka don ka jingbym sngewtynnad na ka liang ki paidbah kiba la bitar halor ka jinglong-jingman, kitei ki kynhun seng ki la dawa ban kem mardor ïa uba shah kynnoh donkti hapoh katei ka tarik lym kumta kim banse ban ïaid shakhmat bad ka jingïakhih.
