Shillong, Nailar 09
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon u la pynsngew halor ka jingdon jong ka kynhun ‘High Level’ kaba ïadon bynta ha ki kam tih bad shalan dewïong be-aiñ hapoh ka Jylla.
Ïa kane u Dr. Syngkon u la ong haba ïashim bynta ha ka ‘Zero Hour’ hapoh ïingdorbar Lok Sabha ha ka Sngi Thoh-dieng.
“Nga kwah ban pynsngew halor kane ka mat ba donkam bad kata ka long ba ha u snem 2014, ka NGT ka la khang ïa ka jingtih bad jingshalan dewïong ha Meghalaya, kaba long kawei na ki kam ba hakhmat eh jong ki nongshong shnong ka Jylla,” la ong u MP.
U la ong ruh, “Hynrei kaba sngewsih ka long ba wat hapdeng ka jing-khang jong ka NGT, ka don kane ka kynhun ïa kaba la tip kum ka ‘High Level’ – ki la ïadon bynta ha ki kam tih bad shalan dewïong bad kane ka long kaei-kaei kaba hap ban shimkhia.”
Na ka liang u Dr. Syngkon u la kdew ba ka Sorkar ba synshar mynta ha Meghalaya ka khapbrib khmat haba ïadei bad kane ka kam.
“Kumta nga kyntu ïa ka Sorkar ban shimkhia ïa kane ka kam la ban pyntikna ba ka jingkhang tih dewïong ka treikam pura ne ban pyllait noh ïa ka khnang ban shah ïa ki briew kiba la shaniah ha kane ka karkhana ba kongsan na bynta ki lad kamai jong ki,” u la ong.
