Shillong, Nailar:
Ka KSU West Jaiñtia Hills District Unit ryngkat bad ka KSU War Jaiñtia Circle ha ka 7 tarik Nailar 2024 ka la leit jurip sha ki bynta ka thaiñ Dawki-Amlympiang bad kiwei ki jaka khappud bad ka Ri Bangladesh na ka bynta ban ïakynduh bad ki nongïalam jong ki shnong ban ïathir ïasyllok halor ka jinglong jingman ha shi lynter ki bynta khappud khamtam halor ka jingjia ka kam poh-ïing jong ka Ri Bangladesh.
Ha kane ka jingïakynduh lang, ka seng ka la ïoh ban ïamir jingmut ïa bun ki mat bad ki Dorbar Shnong.
Na ka liang ki shnong bad ka seng ki la ïa shim ïa ka rai ban long kiba la khreh ban ïakhun lang ïa kino-kino ki jingïaleh lada ka long ha kano-kano ka bynta ruh lada ki khar Bangladesh ki thmu ban wan tur beaiñ shapoh ka Ri, l ong ka kyrwoh na ka KSU.
Ha kane ka sngi, ka seng ka la ïoh ruh ban ïakynduh ïa u Officer Incharge jong ka Infiltration Dawki bad la ïoh jingtip ba ki nong Bangladesh ki pyrshang hi ban rung sha Meghalaya (India) hynrei kim ïoh shuh ban rung namar ba ka ophis Migration jong ka Bangladesh ka la khang.
Na ka liang jong ka seng ka la ïoh ruh ban jurip ïa katto katne tylli ki jaka kiba ki khar Bangladesh ki ju pyndonkam ban rung tuh sha ka Jylla Meghalaya (India). Kawei na kine ki jaka ka dei ha ka shnong Amlympiang ha kaba bunsien ki khar Bangladesh ki ïoh lad bha ban rung shapoh ka Ri bad la ïoh jingtip ba haduh mynta ki khlem don ki BSF ban peit pyrman ha kane ka jaka.
Ka seng ka la ïoh ruh ban ïakynduh ïa ki nongïalam shnong ka Bakur bad Dawki bad ki ïathuh ba haduh mynnin na ka liang ki khar Bangladesh ki la wan ban tur ha ryngkat da kaba khlong ïa ki maw palat ïa ka jaka kaba tip kum ka No Man’s land (Zero-point). Na ka liang ka Dorbar Shnong ka kwah dik-dik ban pynbeit noh ïa u pud u sam uba biang namar haduh mynta na ka liang ka jong ki (Dorbar Shnong Dawki) ki ju kohnguh bad ïatrei lang bad ki bor kiba dei peit, hynrei ki khar Bangladesh ki wan khlong jubor ïa ki maw da kaba tam pud na ka por sha ka por. Kumta na ka liang ka seng kan sa shim ïa ki sien jam na ka bynta ban ïada ïa u pud u sam bad ka jingshong shngaiñ ka ri bad ka jaidbynriew hi baroh kawei.
