Berlin, Nailar:
Ki kynhun iarap jong ka Germany ha ka Sngi Balang ki dang iakhun ban ioh sei ia ki lanot kiba ngat bad sahkut hapoh kawei ka iing-mala kaba heh bad kaba la khyllem noh ha katei ka sngi kaba don ha ka thaiñ Sepngi jong ka Germany. Ha kane ka jingjia ar ngut ki briew ki la duh noh syndon ia la ka jingim bad katto katne ngut pat ki la mynsaw.
Namar la ong dei ka bynta ba shapoh jong katei ka iingmala kaba don hapoh ka shnong Kroev kaba la twa noh ha katei ka jingjia, ka shnong Kroev ka jngai kumba 110 Kilometre (68 Miles) na ka phang Sepngi jong ka Frankfurt. Kane ka la jia ha ka por kumba 11 baje jong ka miet Sngi Ba-ar, khlem kano-kano ka daw ne ka jingai dak lypa.
Ha katei ka jingjia, la ong ba ar ngut kitei kiba khlad ki kynthup ia uwei u shynrang bad kawei ka kynthei kiba la khlad noh ha shen.
La iathuh ruh ba napdeng 14 ngut kiba don hapoh jong katei ka iing-mala (iing-basa) ha katei ka por ba katei ka bynta ba shapoh ka la twa, tang 5 ngut ki dei kiba la ioh phet noh kloi shabar bad kiba la lait thaw khlem kano kano jingmynsaw.
Kumta na ka liang ki briew jong ka kynhun iarap ki la ioh sei noh shwa ia uwei briew, iwei khynnah rit bad ar ngut ki longkmie tad haduh ka step Sngi Balang ba la pyllait ia kane ka khubor.
Katba, lai ngut kiwei pat ki dei kiba dang sahkut hapoh jong katei ka jaka kaba la twa bad ki kynhun iarap ki la iathuh ba kitei lai ngut ki la mynsaw jur. Tang mar ia ioh ban sei ia ki na katei ka jaka la hap ban pynkit noh sha jaka sumar mar-mar khlem da pynslem shuh.
La ong ba ki kynhun iarap ki la ioh ban pynkynriah noh pat ia kiwei 30 ngut ki paramarjan kiba sah mar khap bad katei ka iingmala. La iathuh ruh ba ki don haduh kumba 250 ngut ki briew jong ka kynhun iarap kiba la leit ban iakhun ha katei ka jingjia namar ba katei ka iingmala ruh ka dei kaba la kham heh.
