Shillong, Nailar 09
Ha ka step jong ka 9 tarik u Nailar 2024, ka Hynñiewtrep Youths’ Council (HYC) ka la ïoh bat haduh 15 ngut ki nongdih drok na phyllaw jong ka Civil Hospital Shillong. Napdeng kine, 2 ngut ki dei ki nongkhaïi drok ba shyrkhei bad 13 ngut pat ki dei kiba ju dih bad pyndonkam ïa u drok.
Ha ka jingkhynra jong ka seng na kitei ki nongkhaïi bad nongdih drok, la lap ïa ki mobile phone kiba don haduh 14 tylli, u drok ‘heroine’ kiba la thep ha ki jingbuh, ki thyrnia injek, ki pisa khynthup ïa ki ATM Card bad ki tiar pynmynsaw.
Na katei ka jinglap jong ka seng, ka la lap ba u don uwei napdeng kiba dih drok, u la phla ba ha ka por ba wan lynshop ka khlam Covid-19, u drok u la sdang duna namar ki briew kim ïoh lad shuh ban thied. Hynrei mar sien kut ka khlam bad ka jingkhang dam, ki nongdie drok ki la sdang ban pynhiar ïa ka dor jong u drok khnang ban khring ïa ki samla ba kin ngop ha une u jait jingdih pynbuaid bad hadien tang katto-katne por eiei ba kiba bun ki samla ki la sdang ngop ha u drok, ki nongdie ki la sdang pynkiewdor noh ïa u drok sha ka T.500. U la ong ba ka jingbym ïoh kam ïoh jam wat hadien ka jingpyndep ïa ka jingpule ka la long kawei na ki daw kaba pynlong ba un ngop ha u drok namar ha man la ka por ba ki samla ki thep kam-thep jam kim ju ïoh satia, namar kiba bun na ki kam ki dei kiba lah thep briew lypa, kumta khnang ban lait na kino-kino ki jingkhuslai kim banse ban dih drok noh.
Na ka liang ka seng hadien ka jingïoh kurup ïa u drok uba bun na kitei ki nongdih bad nongdie drok, ka la thang noh ïa baroh u drok kynthup ïa ki thyrnia injek.
