Khliehriat, Nailar 09
Ki VDP (Village Defence Party) jong ka shnong Sonapyrdi, East Jaiñtia Hills District ha ka 9 tarik Nailar ki la ïoh bat ïa uwei nong Bangladesh uba la wan rung be-aiñ sha India lyngba ki shnong khappud ka India-Bangladesh.
Ïa une u nong Bangladesh la ïoh bat ha ka por ba ki VDP jong ka shnong Sonapyrdi ki dang pahara hapoh u pud u sam jong ka shnong hapoh ka jingïalam u President VDP, Bah Boikmen Mynthoi bad Assistant Secretary VDP, Bah Stephan Lamare ryngkat u Naik bad ki Volunteer VDP.
Ha ka jingtohkit ki VDP, une u nong Bangladesh u la ïathuh hok ba u wan na Bangladesh da ka jingthuh ban leit sha Ladrymbai.
Hadien kane, ki VDP ki la aiti noh ïa une u nong Bangladesh sha ki pulit ka thanat Lumshnong ban leh ïa kaba donkam.
Ki VDP Sonapyrdi ha u kyrwoh, ki la pynpaw ka jingsngewlyngngoh ba kumno une u nong Bangladesh u ïoh ban rung be-aiñ sha India ha kum kane ka por kaba dang don ka jingïakynad kaba jur ha Bangladesh.
Ka VDP Sonapyrdi ka kyntu ruh ïa ka Sorkar ban pynkhlaiñ ïa ki bor pahara da kaba buh ïa ki ‘Infiltration Check Post’ kiba khlaiñ ha ki thaiñ Sonapyrdi khnang ba ki nong Bangladesh kin ym ïoh shuh ban rung sha India lyngba ki shnong khappud ba don ha ka thaiñ namar ki BSF kiba don hajan jingkieng Sonapyrdi kim lah ban tehlakam ïa ka jingwan rung kyrthep ki nong Bangladesh.
