Shillong, Nailar 09
U National Secretary bad National Spokes-person ka BJP uba khmih ruh ïa ka Megha -laya bad Nagaland, u Anil K. Antony ha ka Sngi Thohdieng u la pynbna ïa ka ‘Har Ghar Tiranga’ na shlem treikam ka seng kaba don ha Shillong.
Katei ka sienjam jong u Myntri Rangbahduh ka ri, u Narendra Modi ha kine ar snem ba la dep, kaba la pynwandur ban hap lang bad ka ‘Azadi ka Mahotsav’ ne ka jingrakhe ïa ka jingdap 75 snem ka jinglaitluid ka ri, ka la long ka tamasa ieid ri kaba heh tam hapoh India.
Haba ai jingkren, u Antony u la ong, “La slem bah mynta, ka jingïadei jong ngi bad la ka jong ka lama ka ri ka long kaba kham ïa jngai. Hynrei, kane ka sienjam jong u Myntri Rangbahduh ka ri, mynta ka la pynkylla ïa ka jingïadei jong ngi bad ka lama lai-rong ban nang jan shuh-shuh sha ka. Mynta u snem ruh, u Myntri Rangbahduh u la khot la wer ïa man la ki nong India ban pyni sarong ïa ka lama ka ri ha la ki ïing ki sem nalor kiwei-kiwei katba lah ei.”
“La pynkhreh ïa kiba bun ki prokram ha kylleng ka ri ban pynlong ïa ka jingrakhe ha ka sngi laitluid ka ban ïashim bynta da baroh lang. Hapdeng ka 11 haduh 14 tarik u Nailar, baroh ki konstitwensi sha ki ïingdorbar thawaiñ ki Jylla hapoh ka ri kin sakhi ïa ki ‘Tri-ranga Yatra’ ha ka rukom jong ki ‘Rally’ thuk-thuk, jingïamareh, jingïaid kjat bad kiwei-kiwei. Ngi kyrpad ïa ki nongshong shnong ka Meghalaya ban ïashim bynta paidbah ha baroh ki prokram,” la ong u Antony.
Utei u nongïalam u la ong ruh ba ka seng kan sa leh burom ïa baroh ki nongïakhun laitluid ha ka 13 tarik Nailar ba kynthup ïa ki nongïakhun laitluid ka Meghalaya – U Tirot Sing, U Kiang Nongbah bad Pa Togan Sangma nalor kiwei-kiwei.
Haba kdew ba ha ka 14 tarik Nailar yn sa pynlong ïa ka prokram ban pynkynmaw halor ka jingshyrkhei jong ka jingïaphiah ka ri, u Antony u la ong, “Lyngba kane, ngi kwah ban phah kyrwoh sha ka Congress hapoh ka jingïalam u Rahul Gandhi bad ki seng ka liang pyrshah ban sangeh ïa ki jingpyrshang ban pynïaphiah ïa ka ri ha ka kyrteng ka niam, kyrdan bad jaidbynriew.”
U la kyrpad ruh ïa ki paidbah ba kin ym ngop ha kaba kum katei ka saiñ pyrthei jong ka jingïaphiah naba ki ‘agenda’ jong ka jingïaphiah ki wan ha ryngkat ka jingjulor kaba khraw – kaba ktah kylla pat ïa ka jingim briew.
“U Myntri Rangbahduh u la mih shakhmat bad ka ‘Sabka Saath, Sabka Vikaas’ bad ngi dang don ha ka lynti ban poi sha ka thong – ban long ka ri kaba kiew ha ka ïoh ka kot hapoh u 2047. Ngim dei ban ai lad ba ka saiñ pyrthei jong ka jingïaphiah kan pyndkoh noh ïa ka thong jong ngi,” la ong u National Secretary ka BJP.
Shuh shuh u la bynrap ba na bynta u Myntri Rangbahduh, ka Thaiñ Shatei Lam Mihngi ka dei ka jaka kaba la pynleit jingmut bad kumba T.6 lak klur la dep ban pynlut ha ka liang ki lad pynïasoh bad kam pynroi ban pyntikna ïa ka jingkynthup lang ba pura ïa ka thaiñ bad ka ri baroh kawei.
“Ka thaiñ mynta ka dei ka khyrdop ka India sha phang Mihngi bad ki ri hapoh ka thup ASEAN, bad ka juk thymmai jong ka jingnang kiew ka la sdang ha ki Jylla ka Thaiñ Shatei Lam Mihngi. Ngi kyrpad ïa baroh ki nongshong shnong ka thaiñ ban rakhe ïa kane ka kyrdan ba shem thymmai da kaba ïashim bynta lang ha ka tamasa da kaba pynïeng ïa ki lama ka ri ha la ki ïing ki sem ha ka 15 tarik Nailar,” la ong u Antony.
Na ka liang jong u, u la ïakynduh ruh ïa u Myntri Rangbah ka Jylla, u Conrad K. Sangma.
Kane ka long ka kyrwoh na u Convenor ka State Media Cell – BJP, Meghalaya Pradesh, Sabyasachi Ghose.
