Shillong, Nailar 09
Haba ka tnad ïalehkai jong ka ri Pakistan ka dangrai ïano ban bei tyngka napdeng ki hynñiew ngut ki nongïalehkai na ka bynta ka Paris Olympics, tang u Arshad Nadeem bad u coach ki la long kiba biang na ka bynta ka jingbei tyngka.
U Nadeem bad u coach jong u, u Salman Fayyaz Butt ki dei kiba donbok ban ïoh ïa ka tiket liengsuiñ jong ki da ka PSB (Pakistan Sports Board). Pynban ha ka step jong ka sngi Thohdieng, une u rangïalehkai ba 27 snem ka rta na ka shnong Khanewal ha ka thaiñ Punjab u la siew kylliang da kaba bat ïa ka rekod ha ka Olympic bad ruh ban khur ïa ka takma ksiar kaba nyngkong eh jong katei ka ri ha kane ka lympung bah ka pyrthei.
Ka la long ka jingïathuhkhana jong ka jingkut jingmut kaba sngap jar na ka bynta u Nadeem, kaba ka ïing ka sem jong u ka la ïakynduh jingeh ban thied ïa ki jingbam katba ki mon. Une u nongkawang sum u dei uba lai na ki hynñiew ngut ki para ha kaba u kpa jong ki u dei u nongtrei shna ïing. Da kaba shim ba u kpa u dei tang ma u uba pyndap pynbiang ïa ka ïing ka sem, ka longïing kan ïoh ban bam doh tang shisien ha ka shisnem, ha ka por Eid al-Adha, la pynpaw ka khubor ha ka Al Jazeera kaba la sot ia ka jingkdew jong u hynmen rangbah jong u, u Shahid Azeem. Pynban ha ka sngi Thohdieng une u rangïalehkai uba don ïa ka synïeng kaba 63m” u la lah ban pynthikna ban khur ïa ka takma ksiar hadien ba u la lah ban kawang shaduh 92.97m, ha kaba u lahduh jong ka Tokyo Olympic, u Neeraj Chopra u la hiar sha ka kyrdan ba-ar.
