Shillong, Nailar 09
U MP ka Congress na Tura Parliamentary konstitwensi, u Saleng A. Sangma u la kyrpad ïa u Myntri ka tnad kam pohïing ka Sorkar Pdeng, u Amit Shah ban shimkhia ha ka ban tehlakam ïa ka jingwan rung be-aiñ jong ki nong Bangladesh shapoh ka Jylla.
“Kumba ka long mynta, da ki hajar bad lak ngut ki poiwir Rohingya, ki la rung be-aiñ sha ki Jylla ka Thaiñ Shatei Lam Mihngi,” la ong u Sangma haba ïashim bynta ha ka ‘Zero Hour’ hapoh ïingdorbar Lok Sabha ha ka Sngi Thohdieng. Haba kdew ba ka thaiñ ka don ïa ka khappud kaba kumba 2000 km ka bym pat don jingker, u MP u la ban jur halor ka jingdonkam jong ki lad jingïada kiba hap ban shim da ka Sorkar Pdeng.
“Ngim don ki lad jingïada kiba biang ïa mynta hapoh ka Jylla jong ngi bad kumta da ki hajar ngut ki mad jingeh mynta,” u la ong.
Ha kajuh ka por, u la pynsngew ba tang ha ka Sngi Palei, palat hajar ngut ki nong Bangladesh ki la pyrshang rung be-aiñ sha Meghalaya lyngba ki jaka khappud.
“Kumta lyngba jong ki phi (Lamphang) nga kwah ban pynsngew sha u Myntri ka tnad kam pohïing ka Sorkar Pdeng ban shim ïa ki lad jingïada kiba mardor,” u la ong.
Kum ban shu kdew hangne, ha ka Lah Sngi U Blei, ka la don ka jingsaphriang jong kawei ka dur-khih kaba pyni kumba ki briew na Bangladesh ki la wan tur sha khappud Tamabil, Dawki. Kumjuh ka la don sa kawei ka dur-khih kaba la saphriang bad pyni kumba ki briew na Bangladesh ki dang ïalum ha khappud ha ryngkat ki jingpynthaba jingshai lyngba ki ‘mobile phone’ jong ki.
Namar ka jinglong-jingman ha Bangladesh kaba la poi shaduh u pud ba ka Myntri Rangbahduh ka ri, ka Sheikh Hasina (kaba la ieh noh kam) ka hap ban wan phet sha India, ka Sorkar Jylla ka rai ban pynjari da ka korphiw ha shi lynter jong ki jaka khappud hapdeng ka Meghalaya bad Bangladesh bad ïa kane ka korphiw la pynjari 12 kynta hapoh 200 mitar na khappud.
Ka korphiw ha kine ki 200 mitar na khappud kan treikam naduh 6 baje janmiet haduh 6 baje mynstep man la ka sngi tad haduh ban da pynbna da kumwei pat.
