Shillong, Nailar:
U nongïalam ka liang pyrshah ha ïingdorbar thawaiñ, Bah Ronnie V Lyngdoh uba dei u MLA ka Congress na Mylliem, u la ong ba haduh mynta um pat tip tikna la kita lai ngut ki MLA Congress kin leit ban pynïasoh sha ka seng NPP.
Haba u nongthoh khubor u la ïoh ban ïakren kyrpang bad u Bah Lyngdoh ha phyllaw ka shlem treikam jong ka Khasi Hills Autonomous District Council (KHADC) hadien ba u la wan ïakynduh ïa u CEM Bah Pynïaid Syiem u la ong ba haduh mynta ym pat don kita ki MLA Congress ban pyntip ba kin rung noh sha ka seng NPP.
“Lada kita ki lai ngut ki MLA Congress kin mih noh, nga la sah satang marwei kum u MLA” u la ong.
Haba u nongthoh khubor u la pyrshang ban kylli da kiwei pat ki jingkylli, u Bah Lyngdoh um kwah than ban jubab namar u ong ba ïa kane ka kam un sa wad jingtip ba kham bniah la ka dei ne em kaba shisha.
Kum ban shu pynkynmaw, lai ngut ki MLA Congress kiba pynkhreh ban rung sha ka seng NPP kaba ïalam ïa ka sorkar jylla ki long u MLA na Umsning constituency Dr. C Lyngdoh, u MLA na Mawhati constiutuency Bah Charles Marngar, U MLA na Nongstoiñ constituency Bah Gabriel Wahlang.
Ki khubor ki ïathuh ba kine MLA Congress ki thmu ban leit pynïasoh pura sha ka seng NPP namar kim kwah ba ha KHADC kin ïatreilang bad ka NPP katba ha ïingdorbar thawaiñ kin shong sha liang pyrshah namar u Bah Gabriel Wahlang, Bah Charles Marngar bad Bah Ronnie V Lyngdoh ki dei ki MDC bad MLA.
Ki khubor ki ïathuh ruh ba kane ka jingthmu ban rung sha ka seng NPP ka dei namar ba u Bah Vincent H Pala uba dei u President ka MPCC u don bha ka jingïajan bad ki nongïalam ka NPP.
Shuh shuh ki khubor ki ïathuh ba naduh ba mih ka khubor, kane ka jingïakren hapdeng ki nongkyrshan jong kine ki MLA bad ka jingïakren bad ki nongïalam ka NPP ka dang ïaid shwa ban rung pura sha ka seng NPP.
Sa kawei ka khubor ki ïathuh ba ka jingbym lah u Bah Lyngdoh ban rung sha ka NPP ka dei namar ka jingkhang kam shym la plie namar la don lypa u MLA barim uba dei ruh u Myntri barim ka Sorkar MDA-1 u Bah Hamlet Dohling uba long mynta kum u nongaibuit jong u Myntri Rangbah ka jylla u Conrad K Sangma, katba kiwei ki constituency kim da don jingeh ïa ki MLA Congress ban rung sha ka NPP.
