Shillong, Nailar 09
Lehse kan dei ka khubor kaba pynkmen ïa kiba bun ki samla pule kiba pule ha ki skul kiba hap hapoh ka Meghalaya Board of School Educa-tion (MBoSE) namar naduh u snem 2025, ka Sorkar kan ailad ïa ki samla pule ban thoh biang ïa ka eksamin Secondary School Leaving Certificate (SSLC) tang hadien ba la pynbna ïa ka result na ka bynta kito kiba khlem pass ha ka eksamin kaba nyngkong.
Ka MBoSE ka ju pynlong ïa ka eksamin shisien shisnem haduh mynta, hynrei ka jingpynkylla kan treikam naduh u snem 2025.
Ïa kane ka rai ban pynlong eksamin SSLC ar sien shisnem la mynjur da ka Kynhun Myntri ka Sorkar Jylla ha ka Sngi Thohdieng lyngba ka jingmynjur ban pynkylla ïa ki kyndon ka Meghalaya Board of School Education Regulations of Secondary School Leaving Certificate Examination, 2011.
Haba kren sha ki lad pathai khubor hadien ba la wai ka jingïalang jong ka Kynhun Myntri, u Myntri ka tnat Pule- Dangle ka Jylla, u Rakkam A Sangma u la ong ba ka Kynhun Myntri ka la ai jingmynjur ïa ka Amendment lane ka jingpynkylla ïa ki kyndon jong ka MBoSE Regulations of SSLC Examination, 2011 ha kaba ka MBoSE naduh u snem 2025 kan pynlong noh ar sien ïa ka eksamin SSLC bad ïa ka eksamin SSLC banyngkong yn pynlong ha u Rymphang, 2025 bad ïa ka eksamin SSLC ba-ar yn pynlong ha u Jymmang 2025 tang na ka bynta kito kiba khlem pass ha ka eksamin kaba nyngkong.
U Rakkam u la ong ba kane ka long shibynta katkum ka National Education Policy bad ka dei ruh ka jingailad ïa ki samla pule kiba khlem pass lut ïa ki sobjek ha ka eksamin banyngkong ba kin thoh biang ïa ka eksamin ka ba-ar tang ïa kito ki sobjek kiba khlem pat pass hadien ba la pynbna ïa ka result jong ka eksamin banyngkong.
U Rakkam u la ong ba lada pynlong eksamin SSLC tang shisien, kito ki samla kiba khlem pass ki hap ap shisnem haduh ban da pynlong biang ka MBoSE ïa ka eksamin ha uwei pat snem bad ka long ka jingduh ïa ki samla bad ka rta jong ki ruh ka la nang heh.
Hynrei lada pynlong ïa ka eksamin ar sien kan ïarap shikatdei eh ïa ki samla pule kiba khlem pass lut ïa ki sobjek namar kin ïohlad ban thoh eksamin biang tang ïa kito ki sobjek kiba ki khlem pat pass.
U Rakkam u la pynbna ba naduh u snem 2025, ïa ka eksamin SSLC lane eksamin Matrik yn pynlong ha u Rymphang bad ïa ka eksamin ba-ar pat yn pynlong ha u Jymmang.
Ha u snem 2026 pat, u Rakkam u la ong ba ïa ka eksamin SSLC banyngkong yn pynlong noh ha u Nohprah, 2026 bad ïa ka eksamin ba-ar yn pynlong ha u Rymphang, 2027.
Shuh shuh u la ong ba naduh u snem 2027 shaneng, ki samla pule kiba thoh ïa ka eksamin SSLC ki hap ban pass lut baroh ki sobjek, bad yn nym ailad shuh ban kiew klas lada pass tang 5 tylli ki sobjek kumba ailad mynta ban kiew klas.
