Shillong, Nailar 09
Ka Shillong Lajong FC kan pynkhreh ïa ka jingïakhun pyrshah ïa ka Rangdajied United FC ha ka lympung ïalehkai 133rd Indian Oil Durand Cup ka ban long mynta ka sngi Saitjain ha Jawaharlal Nehru Stadium, Polo.
Ka Lajong kham ha shwa ka la lah ban pynliem ïa ka Tribhuvan Army FC na Nepal da 1-0 kol ha ka jingïakhun kaba nyngkong jong ka Group-F. Kumta ka donkam ban jop ha kane ka jing-ïakhun kaba ar. Kumjuh ka Rangdajied kaba la mih bujli ha ka jaka ka Hyderabad FC, ka donkam ïa ka jingjop kaba nyngkong ha kane ka lympung namar ha ka jingïalehkai ba la dep ka la shah rem da 3-4 kol ha ka FC Goa.
Kumba ka long mynta ka FC Goa ka dang dei ka kynhun kaba lamkhmat ha kane ka group hadien ba la lah ban pynliem ïa ka Tribhuvan Army FC da 2-1 kol ha ka Sngi Palei. Kane ka nam jop ka la wan urlong lyngba u Lalthangliana bad u Sitroy Carvalho na ka bynta ban pynlong ïa kane ka kynhun ialehkai Indian Super League (ISL) ban kamai 6 point na ki ar sien ïakhun.
Ïa ka kyrdan ba-ar la bat da ka Shillong Lajong FC (3 point), katba ka Rangdajied United FC bad ka Tribhuvan Army ki dang mad ïa ka jingshah rem.
Kumta katei ka jingïakhun hapdeng ka Shillong Lajong bad ka Rangdajied kan long ha ka por 4 baje janmiet.
