Shillong, Nailar 09
Ka Christian Higher Secondary School kan pynkhreh ïa ka jingïakhun quarter final pyrshah ïa ka Porompat Sabal Leikai High School kaba na Manipur ha ka lympung ïalehkai Subroto Cup International Football Tournament 2024 ka ban long mynta ka sngi Saitjaiñ ha ka por 9:30 mynstep ha KIIT Global School, Gurugram kaba ha nongbah Delhi.
Kumba ka paw katei ka kynhun ki ‘thei ïalehkai Under-17 kaba na Pahamsyiem Nongpoh, ka la ïoh ban bat ïa ka kyrdan ba hakhlieh jong ka Group-D ha ryngkat bad 9 point na ki lai sien ïakhun. Kane ka kynhun ka la lah ban pynliem nyngkong ïa ka Indian Public School Conference (IPSC) da 10-1, hadien da 1-0 kol ïa ka Maharashtra bad ïa ka Punjab da 12-0 kol.
Kawei pat ka jingïakhun quarter ka ban long ha katei kajuh ka madan kan long hapdeng ka Betkuchi High School na Assam pyrshah ïa ka Bangladesh Krira Shikkha Protisthan kaba na Bangladesh.
Kiwei pat ki jingïakhun quarter final ki ban long ha Ambedkar Stadium kin long hapdeng ka Mother International School kaba na Jharkhand pyrsahh ïa ka Tripura Sports School bad ka GSSS Alakhpura na Haryana ïa ka Home Mission School kaba na Mizoram.
