Shillong, Nailar 09
Ka jingïakynduh hapdeng ka Sorkar Jylla bad ka Harijan Panchayat Committee (HPC) kan long ha ka Sngi Saitjaiñ ban ïakren ïa ki kam kiba dang sahteng kiba ïadei bad ka jingpynkynriah ïa kiba sah ha Them Metor ne Them Ïew Mawlong sha kawei pat ka jaka.
La khmih lynti ba kane ka jingïakynduh kan poi artad sha kaba kut ban pynbeit noh ïa ki jingeh kiba la sahteng mynta la bun phew snem.
Ka tyllong khubor ka ïathuh ba ka Sorkar ka la pynbeit ïa ka jingïakynduh ha Secretariat ha ka Sngi Saitjaiñ ha ka por 12.30 mynsngi. Napdeng kiba bun ki jingïakren, ka HPC ha ka jingïakynduh bad ka Sorkar kaba dang shen, ka la pynpaw shaphang ka jingdon ki jaka mane ha Them Ïew Mawlong bad ka don ka jingbynnud ha kaba lada long kaba lah dei ban pynneh ïa ki ha kajuh ka jaka.
Ka don ka jingsngew bynnud ïa kine ki jaka mane naduh ka Ïingmane haduh ki Gurudwara kiba la tei bad ïeng la bun phew snem ha katei ka jaka bad ba ki briew kiba shong kiba sah ruh ki la im mynta la bun pateng da ki spah snem naduh ka por jong ka Sorkar Phareng kaba wanrah ïa ki ban trei ki kam baroh khamtam ban pynkhuid bad khat ïa ka jaboh jabaiñ ka bym don mano-mano ba treh ban trei ïa kum kine ki kam kiba la kheiñ ki dei ki kam jaboh.
Hynrei la ong ba na ka liang ka Sorkar ka la dep pyni ha ka ‘blue print’ ba ka jingpynkynriah ka dei kaba kynthup lut lang hajuh ym tang ïa ki briew kiba sah ha katei ka jaka hynrei ïa ki jingtei jingshna ruh kiba hap pynpra.
Kham mynshwa, ka HPC ka la pan por ban ïakren bad kiba shong ba sah ha katei ka jaka ban pynsngewthuh ïa ki khnang ba kan jingpynbeit kan long kaba ïaid beit.
Na ka liang ka Sorkar Jylla na ka por sha ka por ka la kren shai ba ka kwah ban pynkynriah ïa kiba shong ba sah ha Them Metor sha kawei pat ka jaka namar kane ka dei ka jingeh kaba la sahteng la slem ha kaba kiwei ki Sorkar ha ki por ba mynshwa ruh ki khlem ktah ïa kane ka mat.
