Shillong, Nailar 09
Ka India ka la khur ïa ka takma rupa kaba nyng-kong eh ha ka Paris Olympics 2024 lyngba u khlur nongkawang sum ne Javelin u Neeraj Chopra hadien ba u la lah ban kawang 89.45 mitar ha ka Sngi Thohdieng.
U Neeraj u la lah ban khur ïa katei ka takma hadien ba u la rangïalehkai na Pakistan u Arshad Nadeem u la pynpra ïa ka rekod ha ka Olympic da kaba lah ban kawang haduh 92.97m na ka bynta ban khur ïa ka ksiar kaba nyngkong eh ïa ri jong u. Katba ïa ka takma rnong la khur da u rangïalehkai na Grenada u Anderson Peters uba la lah ban kawang 88.54 mitar.
Lyngba katei ka takma rupa, u Chopra u la long u rangïalehkai athletics ba nyngkong eh jong ka ri India ban khur ar tylli ki takma ha ka Olympic. Une u nongkawang sum ne Javelin ba dang 26 snem ka rta na Haryana u la ïoh ban khur ïa ka takma ksiar ha ka Tokyo Olympic ha lai snem mynshwa.
Kumba ka paw u Abhinav Bindra u dei u nong India ba nyngkong eh ban khur ïa ka takma ksiar shimet ha ka Beijing Olympics ha u snem 2008. Hynrei une u nongsiat suloi um shym la khur takma shuh ha ki jingïalehkai ha London Olympic ha u snem 2012 bad ha ka Rio Olympic 2016.
Kane ka jingïoh khur takma u Chopra ha ka Paris Olympics 2024 ka pynlong ruh ïa u ban long kum u nongïalehkai balai hadien u nongïalympat u Sushil Kumar bad ka nongïalehkai badminton ka PV Sindhu ban khur ïa ki takma kaba pynbud ha ki jingïalehkai Olympic na ka bynta ka ri India.
U Sushil u la khur ïa ka takma rnong ha ka Beiging Olympics ha u snem 2008 bad ka takma rupa ha ka London Olympics ha ka snem 2012, katba ka Sindhu ka la khur ïa ka takma rupa ha ka Rio Olympics bad ka takma rnong ha Tokyo.
Kane ka khlur ïalehkai kaba la khur takma arsien ha ka Olympic, ka la ïakhun ha ka Paris Olym-pics, hynrei kam shym la lah ban jam shaphrang na ka bynta ban don ha ka jingïaknieh ban khur takma. Ka Sindhu ka la mad ïa ka jingshah rem ha ka He Bing Jiao kaba na China ha ka jingïalehkai pre-quarter final.
Ka jingïalehkai kaba jop tam jong ka India ha ka Olympics ka la wan lyngba ka kynhun ki rangïalehkai hockey kaba la khur ïa ka takma rnong hadien ba ka la lah ban pynliem noh ïa ka Spain da 2-1 kol ha ka jingïalehkai ban ïaknieh ïa ka kyrdan kaba lai ha Paris ha ka Sngi Palei.
Kumba ka paw ka India ka la khur ïa ka takma rnong ha Tokyo Olympic kaba long ka sien kaba nyngkong ha ki 52 snem. Kaba khatduh eh ba ka India ka la khur takma ar sien ha ka Olympics ka dei ha u 1968 bad 1972.
