Khliehriat, Nailar:
Ka Jalyiah Khliehmyntriang Joint Committee ka la ïeng pyrshah ïa ka jingpynkylla ïa ka Draft jong ka Delimitation Committee JHADC halor ka jingphiah MDC Konstitwensi hadien ka Public Hearing.
Ha ka jingïalang kyrkieh kaba la long ha ka 31 tarik Naitung (July) 2024, ka Jalyiah & Khliehmyntriang da kawei ka jingmut ki la shim ïa ka rai ban pyrshah jur ïa ka jingpynkylla jong ka Delimitation Committee ïa ka draft ba la dep pynsngew paidbah ha ka public hearing kaba la long ha ka 11 tarik Naitung ha Khliehriat West Community.
“Ngi pdiang ïa ka draft jong ka Delimitation Committee lada ngi hap sha kano-kano ka Konstitwensi ruh, tangba ngi dei ban don ha kajuh ka Konstitwensi baroh ar shnong kata ka Jalyiah bad Khliehmyntriang kumba la dep pynbna ha ka draft ba nyngkong hashuwa ka public hearing,” la ong ki nongïalam ka Jalyiah Khliehmyntriang Joint Committee.
Katkum ka jingtip kaba tikna mynta pat ka Delimitation Committee ka la pynkylla khongpong ïa katei ka draft ba la dep pynbna ha ka public hearing da kaba phiah ïa ka shnong Khliehmyntriang sha ka Musniang Rangad MDC Konstitwensi katba ïa ka shnong Jalyiah pat ka pynneh ha ka Muthlong Sohkymphor MDC Konstitwensi, kumta ki la pyrshah jur ïa kane ka jingleh jong ka Delimitation Committee.
Ki la ong, kane ka jingleh jong ka Delimitation Committee ka long kaei-kaei kaba ym lah ban pdiang namar ba ha ka jingpynsngew paidbah (public hearing) ki pynbna da kumwei katba hadien ka jingpynsngew paidbah ki la leh sop-sop pat da kumwei wat haba ym don ba pyrshah ruh.
Baroh shi katta ka shnong Jalyiah bad Khliehmyntriang ki don ha kajuh ka Konstitwensi, sa kawei ruh ka polling station jong ka Khliehmyntriang ka dang hap hapoh ka shnong Jalyiah.
Kumta na ka liang ka shnong Jalyiah bad Khliehmyntriang ki kyrpad ïa ka Delimitation Committee ban leh ïa kaba donkam da kaba buh lang ïa ka Jalyiah bad Khliehmyntriang ha kajuh ka Konstitwensi kumba juh long baroh shi katta.
