Shillong, Nailar 09
Ha ka sien kaba nyngkong eh ka nongbah Shillong ka la ïoh ban pynlong ïa ka lympung ïalehkai ASMITA Wushu League na ka bynta ka East Zone kaba la sdang ha ka Sngi Thohdieng ha Indoor Stadium jong ka NEIGRIHMS.
Ïa kane ka lympung la plie da u Dr. B.D.R Tiwari, Joint Secretary jong ka Sorkar Jylla ha kaba la ïadonlang ruh u Brigadier Neelesh Anand Pagulwar (SC, SM, VSM) Commandant ka Assam Regimental Centre kum u symbud kongsan, kumjuh u Director ka NEIGHRIMS u Prof (Dr.) Nalin Mehta, u CEO ka Wushu Association of India u Suhiel Ahmed, kumjuh u President ka Meghalaya Wushu Association u Bah Donny Rapheal Ranee bad kiwei kiwei.
Ha kane ka lympung ïalehkai ka ban neh haduh saw sngi kynthih la pynlong da ka Meghalaya Wushu Association ha ryngkat ka jingïasnoh kti lang ka tnat ïalehkai jong ka Sorkar Pdeng lyngba ka Sports Authority of India (SAI). Ki la don kumba 550 ngut ki nongïalehkai ki ban shim bynta ha ka kyrdan ïalehkai Sub-Junior, Junior bad Senior kiba na ki jylla ka thaiñ shatei lammihngi kynthup ïa ka West Bengal bad Bihar.
Wat la ka dang dei ka sien kaba nyngkong eh ban pynlong ha kane ka nongbah, pynban ka long ka kabu ksiar ïa ka Jylla ha kaba na ka liang ka Meghalaya Wushu Association ka la lah ban sei haduh 80 ngut ki khynnah ki ban ïashim bynta ha kane ka lympung.
Na ka liang u coach ka kynhun ialehkai ka Jylla, u Lamphrang Kharsahnoh u la pynpaw, “Ngi sngewkmen eh ba ngi la ïoh ban pynlong ïa kane ka lympung ïalehkai ha ka sien kaba nyngkong eh ha kane ka nongbah. Watla ka dei ka sien kaba nyngkong, hynrei ngi la lah ban sei haduh 80 ngut ki khynnah ki ban ïashim bynta naduh ka kyrdan Sub-Junior, Junior bad Senior.”
“Ngi kyrmen ba ki khynnah kin lah ban ïalehkai bha ha kane ka lympung namar ngi la ïoh ka lad ban pynkhreh. Ki khynnah ki ban don ha ka thup kaba phra kin ïoh ïa ka lad ban mihkhmat sha ka lympung All India na ka bynta ban ïakhun pyrshah ïa kiwei pat ki nongïalehkai jong kiwei pat ki jylla jong ka ri,” u la bynrap.
