Shillong, Nailar 09
Ka jingkhmih lynti jong ka Vinesh Phogat ban khur ïa ka takma rupa ha ka Olympic ka dang im hadien ba ka Court of Arbitration for Sport (CAS) ka la pdiang ïa ka jingkyrpad jong ka hadien ka jingshah pynduh ïa ka kyrdan kaba la jia tang shuwa ka jingïakhun ban ïaknieh ïa ka takma ksiar ha ka kyrdan ïalehkai 50kg jong ki kynthei ha ka Paris Olympics.
Ka Vinesh ka la shah weng noh ha ka phainal hadien ba la lap ba ka khia palat ïa ka 100 gram ha ka por ba thew ïa ka jingkhia. Ym tang ba ka duh ei ban khur ïa ka takma ksiar, hynrei ka mut ruh ba kan hap ban leit phai sha la ïing khlem ka takma, namar ki nongïalehkai ba la shah weng kim don hok shuh ban khur takma.
Hadien ba la weng noh ïa ka, ka Vinesh ka la ujor sha ka CAS, da kaba kyntu ban pynkylla ïa katei ka rai. Kumta ha ka Sngi Thohdieng, ka CAS ka la pynmih ïa ka jingpynbna ba ka la pdiang ïa ka jingkyrpad bad batai ïa ki sienjam kiba hadien.
Katba ka CAS ka la pynshai ba kam lah ban pdiang ïa ka jingkyrpad jong ka Vinesh ban ïoh biang ban ïakhun na ka bynta ban ïaknieh ïa ka takma ksiar, hynrei ka la mynjur ban bishar ïa ka mukotduma jong ka ha kaba ïadei bad ka jinglah ban ai ïa ka takma rupa (joint silver medal). Da kane ka lah ban pynim biang ïa ka jingkyrmen jong ka Vinesh ban ïoh ïa ka jingjop ha ka Olympic katba ka jingïaid lynti jong ka aiñ ka dang ïaid shakhmat.
“Ka nongkyrpad ha kaba sdang ka la pan ïa ka rai na ka CAS Ad hoc Division ban pyndam noh ïa ka rai bad hukum ban leh biang ïa ka jingthew shwa ka jingïalehkai ba khatduh bad kumjuh ruh ka jingpynbna ba dei ban pynbna ïa ka ba ka long kaba bit ban ïashim bynta ha ka jingïalehkai kaba khatduh.”
“Hynrei kam shym la pan ïa ki lad ki lynti kiba kyrkieh. Ka rukom treikam jong ka CAS Ad hoc Division ka long kaba stet, hynrei kam shym la long kaba lah ban pynmih ïa ka rai halor ki jingdonkam hapoh shi kynta, da kaba buh ha ka jingmut ba ïa ka nongshah mudui ka UWW kan jin da la hap ban bishar shwa. Ka rukom treikam, pynban, ka dang ïaid shakhmat bad ka nongmudui ka la pynthikna ba ka pan ban pyndam noh ïa ka rai ba la pynrem bad ba ka pan ban ïoh ïa ka takma rupa (joint silver medal).”
“Ïa kane ka kam la aiti sha ka Dr Annabelle Bennett AC SC (AUS), kaba shong kum ka Sole Arbitrator, ka ban sa pynlong ïa ka jingbishar bad baroh ki liang mynta ka sngi. La khmih lynti ba ïa ka rai jong ka Sole Arbitrator yn sa pynmih shwa ban kut ka jingïalehkai Olympic,” la pynkut ka kyrwoh.
