Shillong, Nailar 09
Ka lympung ïalehkai Third Division Football League ba la pynïaid da ka Shillong Sports Association (SSA) ka la bteng biang ha ka Sngi Thohdieng ha kaba ka Lamlynti Madanlyngkhi FC bad ka Mawshbuit SC ki la ïasam mar shi point hadien ba ïakhaid mar 2-2 kol.
Ha kane ka jingïakhun kaba la long ha SSA Stadium Polo, baroh ar ki kynhun ki la ïakhun tyngeh, hynrei ka Lamlynti ka la ïoh ban pynkhih jar nyngkong eh ha ka minit kaba 15 lyngba u Ksankupar Khong-ngaiñ. Tang hadien shiphew minit ka Mawshbuit ka la lah ban pynphai kylla lyngba u Lurshai Wankhar na ka bynta ban ïakhaid mar shi kol.
U Lurshai u la pynbud biang ïa ka kol kaba ar ha ka minit kaba 27, hynrei hadien shiteng kynta ka Lamlynti ka la pynïakhaid kylla lyngba u Kyrmenskhem Nongbet ha ka minit kaba 36. Da kane ka jinglah ban pynphai ka la pynlong ïa kine ki kynhun ba kin ïai bteng ha ka ban ïakhun tyngeh shuh shuh, hynrei haduh kaba kut ka jingïalehkai kim shym la lah ban pynurlong bad ki la hap ban pdiang na ka bynta ban ïasam mar shi point ha ka Group-D.
