Shillong, Nailar 11
Ha shwa ba ka ri India hi baroh kawei kan rakhe ïa ka sngi laitluid ne ka Independence Day, u heprit ba dang 7 snem ka rta bad uba don ïa ka sap ba kyrpang kum u rangapkol, u Samborlang Rynjah un mih na la shnong ban leit sha Punjab na ka bynta ban shah pyntbit ha ka shlem ai jinghikai jong ka Minerva Punjab Football Academy.
Une u heprit un mih ha ka 14 tarik u Nailar 2024 lem bad u hynmen arkmie u Banshailang Rynjah ban leit sha Punjab hadien ba la lah ban pyndep ïa ka jingsoi ïa ka kontrak kaba 10 snem bad kane ka shlem ai jinghikai kaba paw jong ka ri.
Naduh ba u dangrit une u heprit uba dei u khun jong i Kong Kyntiewlang Rynjah bad Bah James Sunn na ka shnong Mawryngkneng, u don ïa ka jingthrang bad ka jingangnud ba u kwah ban long kum u khlur nongapkol ka Argentina u Emiliano Martinez, uba la ïohpdiang ïa ka khusnam Golden Gloves ha ka FIFA World Cup 2022 kaba la long ha Qatar.
Lah ban pynkynmaw ba kane ka jingpaw utei u heprit ha ka liang ap kol ka dei lyngba ka jingsaphriang ka durkhih jong u ha ki rynsan social media. Kane dur-khih jong u ka la poi shaduh u khlur ap kol ka Argentina, u Emiliano Martinez. Kumta une u khlur ap kol u la buh ïa katei ka durkhih jong utei u heprit hapoh ka ‘instagram page’ ka jong u bad dei hangne da ki million ngut ki briew kiba la sakhi ïa katei ka sap ba kyrpang jong utei u heprit uba na Mawryngkneng. Dei hangne ruh ba ka shlem ai jinghikai jong ka Minerva ka la kwah ban ai jinghikai ïa u khnang ba un long kum u khlur nongapkol ba kynsai jong ka ri ha ka lawei ka ban wan.
Na ka liang u President ka Shillong Sports Association bad uba long u MLA ka Mawkynrew u Bah Banteidor Lyngdoh ha ka Sngi Saitjaiñ u la pynkup burom ïa utei u heprit ryngkat ki kyntien kitbok kitrwiang ba un nangsan ha ka kam ïalehkai bad ba un long kum u khlur nongapkol ba kynsai kumba u la thrang lypa naduh ba u dangrit.
“Kum uwei na ki ‘riew ïeit phutbol nga kwah ban ai mynsiem ïa une u heprit namar sa tang khyndiat sngi un hap ban leit noh sha Punjab na ka bynta ban shah hikai pyntbit ha ka Minerva,” la pynpaw u Bah Banteidor.
Naba une u heprit u dei u rangapkol, na ka liang u Bah Banteidor u la aiti da ki ‘gloves’ ryngkat ka song pisa sha u Samborlang.
Na ka liang u hynmen arkmie jong u Sambor, u Banshailang u la pynpaw ba ma u, un leit lang sha Punjab. “Hadien ka jingïakren sani bha bad ki bor pynïaid jong ka Minerva, la lah ban pynkohnguh ba kin ai lang bad ka kam na ka bynta jong nga khnang ba u Sambor un ym sngew kynjah haba u don jngai na la ïing.”
