Nongstoiñ, Nailar 11
Ka shlem treikam jong ka District Sports Officer (DSO) jong ka West Khasi Hills District, Nongstoiñ ha ryngkat ka jingïatreilang bad ki bor pynïaid district, ka la pynkhreh ban pynlong ïa ka jingïakob mareh ba la tip kum ka ‘Independence Day Run 2024’ kaba 10 kilometer.
Ha ka kyrwoh khubor, ka Kong Balarina Syiem kaba dei ka District Sports Officer ka West Khasi Hills ka la ong ba kane ka jingïakob ka long shibynta na ka jingrakhe ïa ka Independence Day.
Ka la ong ruh ba ïa kane ka jingïakob mareh kan long na ka bynta ki kynthei bad shynrang ka ban long ha ka 13 tarik mynta u bnai naduh ka por 6 baje mynstep ïa kaba yn sdang ruh na phyllaw jong ka ophis u DC ka West Khasi Hills.
Ka DSO ka la ong ruh ba ha kane ka jingïakob mareh kin don ruh ki khusnam ba kynthup ïa ki syrnod kumjuh ka song pisa, ha kaba na ka bynta ki kynthei kumjuh ki shynrang, ka khusnam kaba nyngkong kan long 5000, ba ar kan long 3000 bad ba lai kan long 2000 tyngka.
La pyntip ruh ba kino kino kiba kwah ban ïa shim bynta kin sngewbha ban leit pynrung kyrteng lane leit mih sha ka ophis jong ka DSO ha lane shuwa jong ka 12 tarik mynta u bnai ha ki por longtrei.
