Shillong, Nailar:
Ka Hynñiewtrep Achik National Movement (HANM) Western Ribhoi District ha ka 7 tarik u Nailar 2024 ka la leit ban ïakynduh bad aiti da ka dorkhas ha u Symbud Myntri Rangbah ka Jylla, u Bah Prestone Tynsong bad uba dei ruh u Myntri ka Sorkar Jylla uba dei khmih ïa ka tnad ki kam pohïing ka Jylla ban pynsngew halor ki laitylli ki mat jingdawa hapoh katei ka thaiñ.
Kitei ki mat jingdawa kiba ka seng ka la leit pynsngew ha u Symbud Myntri Rangbah ki long halor ka jingdawa ban buh ïa ka Police Outpost ha ka shnong Balakhawa kaba hap hapoh u pud u sam ka Hima Nongspung kaba don ha khappud bad ka Assam, ka jingkyrpad ban pynmang skhim na ka bynta ka surok Mawdem-Belahari-Rajakhomai-Mowdongki bad kaba khadduh ka long ka jingdawa ban buh noh ïa ka Fire and Emergency Service Station ha ka thaiñ Patharkhmah.
Ka seng ka la dawa na u Symbud Myntri Rangbah ban buh ïa ka Police Outpost ha ka thaiñ Balakhawa ka shnong khappud bad ka Assam, kaba dei ruh naka bynta ka jingbit jingbiang bad ka jingshngaiñ jong ki paidbah ba shong ba sah ha katei ka thaiñ.
Ka seng ka la ong ba ka jingdon ka Police Outpost ha ka thaiñ Balakhawa kan pynkhlaiñ ïa ka jingsngew shngaiñ ki paidbah nongshnong shnong khamtam ba katei ka jaka ka dei kaba ju mih ki jingïakajia pud bad ym tang katta hynrei kan pynsuk ruh ïa ka jingïatreilang halor ka shongsuk shongsaiñ bad ki pulit naka jylla Assam khamtam ban pynsted ban tehlakam ïa kino-kino ki kam sniew bad ki kam be-aiñ
“Kumta na ka liang ka seng ngi kyrpad na ka Sorkar ba kan pynmang skhim kham kloi ban buh noh kawei ka Police Outpost ha katei ka thaiñ na ka bynta ka jingshngaiñ jong ki paidbah”, ong ka seng.
Ka seng ka la kyrpad ruh na u Bah Prestone bad uba dei khmih ruh ïa ka tnat PWD (Roads) ban pynmang skhim na ka bynta ban shna ïa ka surok kaba pynïasoh naduh ka shnong Mawdem-Belahari-Rajakhomai-Mowdongki bad kiwei kiwei ki shnong ba marjan kiba dei ki shnong khappud ka Meghalaya bad Assam khnang ban pynsuk ïa ki paidbah ha ka leit ka wan namar kane ka surok ka long kaba sniew shaba palat kaba la buh jingeh shikatdei eh ïa ki paidbah ka thaiñ.
“Hadien ba kum ki nongïalam ka seng ngi la leit ruh ban jurip ïa katei ka surok bad ïohi da la ki jong ki khmat halor ka jingshah iehbeiñ bad shah ieh khunswet kitei ki shnong haka Sorkar Jylla”, ong ka seng.
Ka seng ka la ong ba ka jingeh ki paidbah ha katei ka thaiñ kam dei shuh kaba dang thymmai, hynrei ki paidbah ki la mad jingeh bun snem ha kaba ïadei bad ka leit ka wan namar ka jingsniew palat katei ka surok, hynrei kaba sngewsih ka long ba haduh kine ki sngi ka sorkar kam pat shym la phaikhmat ban wanrah ki kam pynroi khamtam u surok sha katei ka thaiñ khappud.
“Kumta kum ka seng ngi kyrpad ba ka Sorkar kan phaikhmat lem ban pynmang pisa naka bynta ban siangrong noh ïa u surok na Mawdongki-Belahari Rajakhumai naka bynta ka jingbit jingbiang jong ki paidbah nongshong shnong ha katei ka thaiñ”, ong ka seng.
Shuh shuh ka seng ka la dawa ruh ban buh ïa ka Fire and Emergency Service Station haka thaiñ Patharkhmah namar kumba ka long ka Patharkhmah ka dei kawei na ki thaiñ kaba la kiew sted ha kine ki khyndiat snem ba la leit noh naduh ka jingdon ki briew, ki ïing ki sem bad ki jaka khaïi, wat hapdeng kane ka jingroi, ka shnong hynrei kam don ïa ka jaka pynlipding, kaba buh ïa ka imlang sahlang ha ka jingma kaba khraw lada jia ba mih ka jingpluh ding ne kiwei-kiwei ki jingjia bakyrkieh.
Ka seng ka la ong ba ka jaka pynlip ding kaba jan tam kadei shaduh Nongpoh, bad kam long kaba suk namar ka lynti ïaid ka long kaba jngai bad lehse kat ban da wan ki kali pynlip ding ka ïing/dukan ne ka shnong ka thaw ka la kylla dpei lut.
“Da kaba shim ïa ka jingdonkam bakongsan jong ka thaiñ Patharkhmah, ha ka liang ka jingbunbriew bad ka jingtrei kam ha ka ïoh ka kot, ka long kaba donkam ban don noh ïa kawei ka jaka pynlip ding na ka bynta ki jingjia bakyrkieh bad ka jingshngaiñ jong ki paidbah”, bynrap ka seng.
Haba ai jingkren sha ki lad pathai khubor ka seng ka la kyrpad na u Symbud Myntri Rangbah ka jylla ban mang pisa na ka bynta ban siang rong noh ia ka surok jong ki shnong kiba don ha khappud Meghalaya bad Assam kata na Mawdem, Belahari Rajakhomai Mawdongki.
Kumjuh ruh ka seng ka la kyrpad ban buh noh da ki jaka pynlip ding ne ka fire and emergency service station ha ka thain Patharkhmah ban pynsuk ia ki paidbah lada don kano kano ka jingjia pluh ding ne kino kino ki jingjia ba kyrkieh.
Ha ka juh ka por ka seng ka la kyrpad ruh na u symbud myntri rangbah ban buh police outpost ha Balakhawa ka shnong kaba don ha khappud bad ka jylla Assam, ka jingdon kane ka police outpost kan pynshngain ia ki paidbah ban pynsted ban tehlakam ia ki kam sniew bad kumjuh ruh ban don ka shongsuk shongsngain ha kaba kane ka jaka kadei kaba ju mih ki jingiakajia pud.
