Shillong, Nailar:
Ka tnad Social Welfare ka Sorkar Jylla ha ka 9 tarik u Nailar 2024, ka la plie paidbah ïa ka ‘Half Way Home for Rehabilitation of Persons Living With Mental Illness’ ne ka jaka kaba ri ïa ki longkmie kynthei kiba don jingshitom ha ka pyrkhat pyrdaiñ bad kiba la shah iehnoh ha ki bahaïing lajong kaba don ha Sawmer Dong Pynthor, Upper Shillong.
Ïa kane ka jaka ai jingsumar, la wan ban plie paidbah da u Myntri ka tnad Social Welfare ka Sorkar Jylla, u Bah Paul Lyngdoh bad uba la pyllait paidbah ruh ïa ka kali kit nongpang ka ban ai jingshakri ha katei ka jaka sumar.
Ha kane ka sngi la don lang ruh u MLA bad uba dei ruh u MDC ka Mylliem Constituency, Bah Ronnie V. Lyngdoh, ka Deputy Commissioner ka East Khasi Hills District, ka Kong R.M Kurbah, ka Kong Camilia Doreen Lyngwa (MCS) Director ka Social Welfare, ki nongtrei ka jaka ai jingsumar nalor kiwei-kiwei ki nongshah khot sngewbha.
Haba ai jingkren ha katei ka sngi kum u kongsan, u Bah Paul Lyngdoh u la ong ba ka jingïoh ban plie paidbah ïa kane ka jaka ai jingsumar ka dei lyngba ka jingtrei shitom jong ka tnad kaba ym tang ba kan ai jingshakri ïa kiba pang hynrei kan ai kam-ai jam ruh ïa ki nongshong shnong katei ka thaiñ.
“Kane ka long ka jingïalang kaba bha shibun jong ki nongshim bynta kiba thmu ban pynkylla ïa kiei-kiei sha ka jingbha”, la ong u Bah Paul.
U la ong ba u ngeit skhem ba kiba trei bad ïarap ha katei ka jaka ai jingsumar, kin ai ka jingsumar ïa ki nongpang da ka mynsiem ka jingshakri bad kular ruh ba ka tnad kan dang ïai trei shitrhem na ka bynta ban ai ka jingshakri kaba paka tam ïa ki paidbah.
“Nga sngew sarong ba ngi ha ka tnad, ngi don ki ophisar kiba aiti ïalade bad nga pan jingkyrshan na ki nongshong shnong hangne kum ka Dorbar Shnong, ka Seng Kynthei bad Seng Samla namar kane ka dei ka shlem treikam kaba don hapoh ka shnong jong phi kaba ai kam ïa ki trai shnong nangne bad ngi ngeit phin peit phin sumar ïa kine ki durkhmat kiba don hangne da kata kajuh ka mynsiem jong ka jingshakri”, la bynrap u Bah Paul.
Shuh shuh u la ai khublei ruh ïa ka jingtrei shitom jong ki nongtrei bad ki dkhot ka tnad Social Welfare kiba la long ki nongshakri kiba radbah ban shakri bad kner ïa ki lad jingïarap sha ki briew kiba don jingpang jingshitom ha ka bor pyrkhat pyrdaiñ da kaba bynrap ruh ba ka long kaba eh ban peit ïa kine ki briew kiba shitom ha ka bor pyrkhat hynrei na ka liang ka tnad pat ka la trei shitom ban shakri ïa kine ki briew.
Ha kane ka jaka sumar ki don 25 ngut ki nongthiah pang bad 15 ngut ki nongïarap ban sumar ïa kitei 25 ngut ki longkmie kynthei.
