Shillong, Nailar:
Hadien ba ka Sorkar dang mynshem bnai ka la pyntip ba la pynsangeh noh ïa ka ‘Smart Road’ ba la shna lyngba ka Smart City Project ha ka Lachumiere, ka jingkylli mynta ka mih ba hato ka Sorkar kan shu ieh noh kumto ne ha kano ka dur ka mut ban pynïaid shakhmat ban pyllait biang ïa kane ka surok kumba ju long ha ki por kiba la leit?
Kane ka surok ka dei kaba ju ïaid kali na shadien jong ka shlem treikam Meghalaya Public Service Commission (MPSC) bad kiwei kiwei shlem treikam kiba bun kiba don sha kane ka liang bad ruh lyngba ka skul All Saint Higher Secondary School ka ban mih sha surok Lachumiere, kata nadien jong ka shlem treikam Passport bad DIPR.
Hynrei kumba ka long mynta hadien ba la pynsangeh noh ïa kane ka projek ha ka jingpynlut ka la long kaba heh, ka jingkylli kaba la mih na ki paidbah khamtam kiba ju pyndonkam ïa kane ka surok, ka long hato ka sorkar ka mut ban shu ieh noh kumto ne ka mut ban leh kumno?
Ka jinglait tang na shiliang bad jingkhang na kawei ka liang, ka la wanrah jingeh shibun ïa ki nongleit nongwan da ki kali saw shaka ne ar shaka ruh kumjuh, namar ym lait shuh ban ïaid lyngba. Kane ym tang ba ka la pynsohsat bad pynjynjar hynrei ka la wanrah ruh ka jingkhapngiah ïa ka ïaid ka ïeng ki kali ha ka thaiñ Lachumiere khamtam lei ha ka por long bad wai skul, naba ki nongwan shaw skul kim lah shuh ban rung bad ïaid lyngba kane ka surok bad la hap ban shu pynïeng kat haba ïoh.
Lah ban pynkynmaw ba ha kaba sdang ïa kane ka projek, ki paidbah kiba bun ki la pynpaw ka jingkmen ba yn sa lah ban pynbha bad kham pynïar shuh khyndiat ban suk ha ka leit ka wan, hynrei ki la pynpaw pat ba ki la kyndit haba la mih ka khubor ba la pynsangeh noh ïa kane ka projek tang shiteng.
Shuh shuh ki la ong ba ha ka jingshisha ka sorkar ka la dei ban pyrkhat naduh shwa ban sdang ïa kane ka projek hynrei kane ka jingieh noh shiteng ka pyni ba kim don jingtip satia bad imat ki la shu leh tang dep tang ban pynhun ïano-re-ïano ne pynmyntoi ïano-re-ïano bad pynsohsat bad pynjar pat ïa u paidbah nongleit nongwan.
Lah ban kdew ba kane ka smart road ka bym shym la lah ban pyndep hapoh ka thaiñ Lachumiere, ka la dei kawei napdeng ki 17 tylli ki Smart City Project ba la pyntreikam ha ka jylla.
