Mawkyrwat, Nailar 11
Ka KSU Sawsymper Circle, KSU Lawbah Border Area Circle bad ka KSU Balat Border Area Circle ha ryngkat ka jingïasnohkti lang bad ka KSU South West Khasi Hills District ha ka 10 tarik u Nailar 2024 ki la pynlong ïa ka ‘Sit In Demonstration’ ne ka jingshong kyllaiñ mongor ha Ïew Mawsynram, East Khasi Hills District Ka jingpynlong ka KSU ïa ka jingshong kylliañ mongor ka dei na ka daw ka jingmynthi ka Sorkar Jylla ban pynurlong noh ïa ka jingdawa jong ki paidbah kaba ki la dawa da ki phew tylli ki snem ban kyntiew kyrdan noh ïa ka Mawsynram C&RD Block sha ka Mawsynram Civil Sub-Division.
Kum ban shu pynkynmaw, ka Mawsynram C&RD Block ka dei kawei na ki Block hapoh ka Jylla kaba la rim bha kaba la don mynta la palat 62 tylli ki snem hynrei kaba sngewsih ka long ba ka mat ban kyntiew sha ka Civil Sub-Division ka shu dei tang ka mat shim kabu jong ki seng saiñ pyrthei bad ka Sorkar tang ha ki por ilekshon.
Na ka liang ki nongïalam ka seng bad ki ‘riew rangbah ki la pynpaw ïa ka jingsngewdiaw kaba khraw halor ka jingshah ieh khunswet ka Mawsynram ha ka Sorkar ha kaba ki la pynpaw ruh ba ïa kiwei ki Block kiba kham hadien bad kiba marjan, ka Sorkar ka la kyntiew kyrdan ïa ki sha ka Civil Sub-Division katba ïa ka Mawsynram pat ka dang sah kut jumjuh.
Ki la ong ruh ba ka Sorkar kam dei ban leh politik ha kaba ïadei bad ka jingkyntiew kyrdan noh ïa ka Mawsynram Block namar ka dei ka jingdonkam jong u paidbah, katno ka long kaba shitom ïa ki paidbah tang ïa i kam ba rit kin hap ban beh shaduh sor Shillong bad teng-teng ki ïakynduh jingeh khamtam ha ka por pang shitom namar ka jingdheng kali kaba sdang naduh 3 Mer ter-ter.
U samla Forwardman Nongrem President KSU SWKHD haba ai jingkren ha ka jingïalang ba lyngkot u la pynkynmaw ba ka seng bunsien ka la pyrshang ban ïakynduh ïa u Myntri Rangbah ka Sorkar Jylla, u Conrad K. Sangma halor kane ka mat hynrei kaba sngewsih ka long ba hadien ka ilekshon u la leh bym patiaw bad sngap man-man.
Shuh shuh u samla Jied Skhem Nongsiej, General Secretary KSU SWKHD hadien ka jingïalang bad ka jingshong kyllaiñ mongor u la pynbna paidbah ba ka seng KSU jong lai tylli ki shnat treikam halor ka jingmynthi ka sorkar, ka seng ka shim ïa ka rai ban pynlong da ka pakhang ophis ïa baroh ki ophis hapoh ka Mawsynram Block ha ka 22 tarik u Nailar 2024.
U la ong ruh ba ka seng kan sa lum ruh ïa ki nongïalam shnong, nongïalam Raid bad Hima bad ïa ki ‘riew rangbah jong ka dong ka thaiñ Mawsynram bad nangne shakhmat ka seng kan sa pynjur shuh-shuh ïa ki jingïakhih lada ka Sorkar kam kyntiew kyrdan noh ïa ka Mawsynram C&RD Block sha ka Mawsynram Civil Sub-Division kaba ki paidbah ki la angnud la slem.
