Shillong, Nailar 11
U MP ka Voice of the People Party (VPP), Dr. Ricky A.J. Syngkon, u la ïakynduh ïa u Myntri ka tnad Civil Aviation ka Sorkar Pdeng, u Kinjarapu Rammohan Naidu ha ka 3 tarik Nailar, 2024 halor ka jinglong-jingman jong ka Kad Liengsuiñ Shillong ne ka Shillong Airport.
Nalor ka jingwad jingtip haba ïadei bad ka jinglong-jingman ka Kad Liengsuiñ Shillong, katei ka jingïakynduh ka long ruh shi bynta jong ka jingbuddien ïa ka shithi ba la phah sha u Myntri ha u bnai ba la dep.
“Na ka liang u MP, u la pynsngew ruh sha u Myntri halor ka liengsuiñ Shillong – Silchar bad Shillong – Agartala kaba la shah pynsangeh treikam wat hapdeng ka jingbiang ha ka jingdon jong ki nongshong liengsuiñ/nongleit-nongwan,” la ong u nongaiktien ka VPP, Dr. Batskhem Myrboh ha ka kyrwoh khubor.
Hashuwa, u MP u la kyrpad ïa ka jingtuklar jong ka Sorkar Pdeng haba ïadei bad ka jingpyntreikam pura ïa ka Kad Liengsuiñ Shillong.
Ha ka shithi ba la phah sha u Naidu ha u bnai ba la dep, u Dr. Syngkon u la kyrpad ïa u Myntri ban shimkhia lem ïa katei ka kam khnang ba kane ka kad liengsuiñ ba kongsan ka Jylla kan treikam ha ka rukom kaba paka tam.
U la ong ba ka Kad Liengsuiñ Shillong ka la don naduh ki snem 1970 bad dei tang kane ka kad liengsuiñ kaba treikam bad kaba ïaineh ha ka jingtreikam jong ka hadien ba la pyndait ïa ka ILS ha u snem 2019.
“Nga sngewthuh ba ka jaka kaba don ïa ka jingheh kaba 224 akar la dep ïoh kumba 15 snem mynshuwa ban pynheh ïa ka lynti ïaid na bynta ka jingwan hiar jong ki liengsuiñ ba kham heh – kaba la ktah pat ïa ka jaka rep, ka jingshah kynriah jong ki spah tylli ki shnong bad ka jingduh noh ïa ka lad kamai, ka jingpynpra ïa ki ïing skul, ïingsah bad ki ïingmane nalor kiwei-kiwei, baroh na bynta ka roi ka par,” u la ong da kaba bynrap ba ka Sorkar Jylla ka la pynlut da ki klur tyngka na bynta ban ïoh jaka bad ka bai lutksan.
“Hynrei ka projek kam pat ïaid shakhmat, kaba long kaba lyngngoh ïa ki nongshong shnong ka Jylla da kaba buh jingmut ïa ka jingmyntoi ba kane ka kad liengsuiñ ka lah ban synñiang sha ka jingkiew ka ïoh ka kot jong ka Jylla khamtam haba la ñiew ïa ka Jylla kum kawei na ki Jylla ba hakhmat eh ha ka liang ki kam jngoh kai pyrthei jong ki nongshang kai pyrthei na kylleng ka ri bad bar-ri kumjuh. Ha ka jingshisha ïa mynta ka la dei ban long ka kad liengsuiñ ha ka kyrdan ‘International’,” u la ong.
“Na kitei ki jingkdew hangne, nga i-kumba ha kawei ka liang, kam shym la don ka jingwad bniah (hashuwa ban ïoh jaka bad bai lutksan) kaba la leh na bynta kane kajuh ka kam da ki ‘riewshemphang, katba ha kawei pat ka liang, ka Sorkar Jylla ka la shim ïa ka sienjam kaba skhem hynrei ka rai ka bym ïahap ban ïaid shakhmat bad ka jingshim jaka bad ka bai lutksan, lym kumta ïa kane ka mat, la lah ban pynbeit la katta por,” la ong u MP.
Shuh shuh u la bynrap, “Ha nga kum u nongmihkhmat paidbah, kane ka long ka mat ka ban hap shimkhia bad khmih bniah da ka jingpynleit jingmut naba ka kynthup ïa ka jingduh jong ka pisa paidbah, jingduh ki jingdon-jingem bad lad kamai jong kiba bun ki nongrep ba lui-lui bad kaba la buh jingeh ïa kiba bun ki briew kiba hap ban leit shaduh Guwahati ban leit sha kiwei-kiwei ki bynta jong ka ri bad ka long ka jingduhnong kaba khraw ïa ka Jylla.”
