Shillong, Nailar 11
Ka Manipur ka la jop ha ka quarter-final jong ka lympung U-17 Girls Subroto Cup 2024 da kaba pynliem noh ïa ka Meghalaya ha ka jingïalehkai kaba la long ha Gurgaon.
Ha kane ka jingïalehkai, ka Manipur ka la lah ban pynliem noh ïa ka Meghalaya tang da shi kol. ïa kane ka kol la ïoh ban khyrwit da ka Alva ha ka minit kaba 24.
Lah ban pynkynmaw ba ka Meghalaya ka la ïoh rung sha ka quarter hadien ba ka la jop lut ïa baroh lai tylli ki jingïakhun ha ka Pool D, kata pyrshah ïa ka Punjab, Maharashtra bad ïa ka Indian Public Schools Conference.
Ïa ka Meghalaya ha kane ka lympung kaba heh la wan ban mihkhmat da ka Christian Higher Secondary School kaba na Ri-Bhoi, kaba la jop bad rah ïa ka nam lahduh ha ka State-Level Subroto Cup ha u bnai ba la lah.
Hadien ka jingshah rem noh jong ki ‘thei ha ka U-17, mynta ka jingkyrmen jong ka Meghalaya ka shong sa ha ki khynnah ka kynhun U-15 boys bad U-17 boys, kata ba la mih khmat da ka Nongjri Presbyterian Secondary School bad ka Myngken Christian Higher Secondary School kiba dei na Ri-Bhoi baroh ar.
Ka lympung ïakhun jong ki U-15 boys la buh ba kan sdang naduh ka 19 tarik mynta u bnai katba na ka bynta jong ki U-17 boys pat kan sdang naduh ka 2 tarik Nailur, 2024.
