Shillong, Nailar 11
U National President ka National People’s Party (NPP) bad Myntri Rangbah ka jylla, u Conrad K Sangma, ha ka Sngi Saitjaiñ u la pynbna paidbah ba ka Dr Mehtab Chandee A Sangma kan dei ka kyrtong jong ka seng ha ka ilekshon MLA shiteng samoi ka ban long ha Gambegre konstitwensi ha West Garo Hills.
Ïa kane, u Conrad u la pynbna ha ka jingïalang paidbah kaba la long ha Gambegre.
Haba pynbna ïa ka kyrteng jong ka Dr Chandee kaba dei ruh ka kurim jong u, u Conrad u la ong ba ka rai ban pynïakhun ïa ka, ka long namar ka jingdawa kaba jur kaba la wan na ki nongshong shnong ka Gambegre.
“Ka (Dr Chandee) kam ju ïashim bynta ha ki kam saiñpyrthei, bad wat hadien ba ngi la ïashong kurim, ka khlem rung sha ka kam saiñ hima sima.
Hynrei mynta, ki paidbah ka Gambegre hi ki la dawa ba ki kwah ïa ka ba kan long ka nongmihkhmat jong ki,” la ong u Conrad.
Ka Gambegre kam shym la don MLA shuh hadien ba u Saleng A Sangma na ka seng Congress u la shah jied noh kum u MP ka Tura sha Lok Sabha.
Shuh shuh u Conrad u la kular ba un sa wanrah ïa ki kam pynroi ha Gambegre bad ha kajuh ka por, ki paidbah kin ym ïakynduh jingeh ban pynsngew sha u ïa ki mat ki jura kiba ki don.
“Lada ka shah jied, ka MLA jong phi kan ïoh ban pynsngew markhmat ïa ki jingeh jong ka konstitwensi, bad kane ka long kaba donkam namar ka Gambegre ka dang donkam shibun ki kam pynroi,” la ong u National President ka NPP.
Kumba ka long mynta, ka NPP ka don 28 ngut ki MLA ha ka Ïing Dorbar Thawaiñ kaba don 59 ngut ki dkhot.
Ka Dr Chandee kam pat ju ïakhun ilekshon haduh mynta wat la ka dei ruh ka National Treasurer jong ka seng.
