Shillong, Nailar 11
U Bah Raphael Warjri uba dei u nongshna ïa u motdur jong u Tirot Sing Syiem uba dei khlawait ka jaidbynriew, u la ong ba ka jingshah pynpra u motdur jong u Tirot Sing ha Dhaka ka dei ka jingbitar ki paidbah haba ki ïakhih ïa ka sorkar ha Bangladesh.
U la pynpaw ka jingsngewsih haba u mot ba shiteng jong u Tirot Sing uba dang pynïeng tang hynñiew bnai u la shah pynpra noh.
Kumta, u don jingkyrmen ba un ïoh shna biang lada ka sorkar kan tei syndon da u mot ba shirynïeng ban pynïeng ha Indira Gandhi Culture Centre ha Dhaka.
“Nga sngew pangnud pangmet ban ïohi ba ïa u mot Tirot Sing u la shah pynkhyllem noh hadien ba ngi la trei shitom ban pynpoi shaduh Dhaka” u la ong.
U la ong ba ka sorkar lyngba ka jingtrei shitom u Bah Paul Lyngdoh bad Bah Fedrick Kharkongor ban pynïeng ïa u motdur ba shiteng u Tirot Sing sha Dhaka.
“Nga don jingkyrmen ynda ka jingïakhih ka la jai-jai kumba ki bor sorkar ki kwah ban tei thymmai da uba jrong shirynïeng, ngan sa ïoh lad ban shna biang sa shisien” u la ong.
U la ïathuh ba ym tang ïa u mot jong u Tirot Sing, hynrei ïa u mot jong ka Indira Gandhi bad ïa ka ïing baroh kawei la shah pynpra lut ha ki paidbhur ha Dhaka.
