Shillong, Nailar 11
Ki nongkyrshan ba radbah jong ka Shillong Lajong ki la rai ban wan kyrshan biang ynda ka ïakhun pyrshah ïa ka FC Goa ha ka 17 tarik u Nailar hadien ba ka la pynliem ïa ka Rangdajied FC da 2-0 kol ha jingïalehkai Durand Cup kaba la long ha ka 10 tarik u Nailar ha JN Stadium, Polo.
Haba phai sha kane ka sngi, nyngkong ki paidbah ki la pyrta baroh ar kynhun hynrei hadien ba ka Rangdajied kam shym la lah ban rung haba ka ïoh penalty ki paidbah baroh ki la pyrta ïa ka Shillong Lajong haduh ban da ïoh ar kol.
Haba ïoh ban ïakren bad ki paidbah kiba wan peit ïa kane jingïalehkai phutbol ha Polo ki don jingkyrmen ba ka Shillong Lajong kan pynliem sa ïa ka FC Goa khnang ba kan ïoh rung sha kawei pat ka kylla jong kane ka lympung.
Na ka liang ki nongkyrshan ki la pynpaw ba ki kwah ban kyrshan ïa ka Rangdajied FC, hynrei mynta ki hap ban kyrshan noh ïa ka Shillong Lajong namar ka la jop naduh ba ka ïakhun bad ka Tribhuvan Army.
Shuh shuh ki la pynpaw ba ka jingkyrshan ïa ka Shillong Lajong ka dei ka kynhun kaba la ju rung ha ka jingïalehkai I-League.
Katba, u Phira Dohtdong, tyngshop ka phlim Dhaka Escape, u Arman Disiar uba dei u tyngshop ki phlim Khasi bad u nongrwai ki la pynpaw ka jingsngewkmen haba ki la ïoh ban kyrshan ïa baroh ar tylli ki kynhun na Shillong. Namar kata, ki don jingkyrmen ba ka Lajong kan dang lehkai bha bad ka FC Goa bad ki kitbok ïa ka Rangdajied FC ba kan dang ïalehkai bha nangne shakhmat.
Ka Shillong Lajong ha kane ka sngi ka la ïoh rah ïa ka nam jop lyngba ka kol na u Ronney Wilson ha ka 22 minit bad u Kenstar Kharshong ha ka minit kaba 49.
