UK, Nailar:
Ka sorkar Britain ha kane ka kynti, ka la pyntip sha ki nongshah pharep bakla ha ki kam runar bad kam pynkheiñ aiñ kaba kim shym la don bynta eiei, ïa u Andrew Malkinson bad la ong ba ka sorkar kan hap ban siew ïa ki jinglut jingsep baroh kum ka bai lut ksan bad ka bai mynraiñ khmat na ka bynta ka por ba ki pynlut ha patok baroh shi katta khlem da dei hok ba ki don kti shisha ha kitei ki kam ba la pharep pyrshah ia ki.
Ki pulit ka Britain ki la pynpaw kyrteng ia uwei na kitei ki nongshah pharep bakla, u Andrew Malkinson, uba la pynlut ia ka por jong u haduh 17 snem ban im hapoh patok halor ka jingshah pynngat kyndon pykheiñ aiñ bad ka jingshah pharep bakla ba u batbor ia kawei ka kynthei ha Salford, Greater Manchester, ha u snem 2003.
Hynrei, la ong ba utei u briew un shah mait noh haduh 100,000 Pound (Rs 1,06,88,639) na ka pisa kab un ioh na ka sorkar kum ka bai lut ksan kaba yn siew sha u bad la ong ba katei ka 1 Klur kan long ban siew ia ka bai thiah bad bai bam jong u hapoh patok ha baroh kitei ki 17 snem kiba u la shong hapoh patok naduh u snem 2003.
Katkum ka jingpynbna na ki lad pathai khubor, u Mr Malkinson u la shah set patok haduh kumba 20 snem duna tang namar katei ka kam batbor kaba um shym la don kti ne iadon bynta eiei. Bad kumta ruh la pyllait noh ia u da ka ïingbishar ha une u Naitung ba la leit, ha kaba la pynkhuid noh ia ka kyrteng ba la bud-nam jong u bad la pynshai paidbah ia ka jingbakla jong ki bor ka aiñ bad ki pulit ha kitei ki phew snem ba la leit bad ba la pynngat pharep bakla ia utei u rangbah baroh shi katta.
