Nongpoh, Nailar:
U Myntri Rangbah ka jylla, u Conrad K Sangma ha ka Sngi Balang u la pyllait paidbah ïa ka prokram CM Farm Plus kum shi bynta ban kyntiew ïa ka kam rep kam riang ha ka jylla bad ka jingïoh jong ki paid nongrep ka thaiñ bad ka jylla hi baroh kawei.
Ha kane ka sngi la wan ban ïadon lang ka Myntri ka tnat Rep ka Kong Ampareen Lyngdoh, u MLA ka Nongpoh Bah Mayralborn Syiem, u Deputy Commissioner ka Ri Bhoi u Abhilash Baranwal, u Jagpal Singh Dhanoa, Superintendent of Police ka Ri Bhoi lem bad kiwei kiwei ki ophisar bad ki paid nongrep ka District.
Lyngba kane ka prokram kaba la pynlong ha Parish Hall Nongpoh, u Conrad K Sangma u la ïoh ruh ban sam ïa ki symbai jong u Large Cardamon sha ki paidbah nongrep ka district kum shi bynta ban pynshlur ïa ki nongrep ban rep ïa ki jaid musli musla kiba rem dor bad kiba lah ban kyntiew khambha ïa ka ïoh ka kot jong ki nongrep.
Haba kren ha kane ka sngi, u Conrad u la pynpaw ba ka sorkar ka don ïa ka thong ban kyntiew ïa ki nongrep kiba kynthup haduh 70% eiei ki nongshong shnong jong ka jylla bad ïathuh ruh ïa ki jingjop jong ka sorkar ha kine ki san snem ba la dep, da kaba kdew ba palat 1,50,000 tylli ki longïing ki la ïoh jingmyntoi na ki prokram bapher bapher kum ka Turmeric Mission, Ginger Mission, Floriculture Mission, Mushroom Mission, bad Spice Mission.
U la ïathuh ruh ba kane ka prokram thymmai, ka CM Farm Plus, ka long kawei pat ka lynti ban kyrshan ïa ki nongrep kiba ju mad jingeh ban ïoh ïa ki symbai kiba bha ha ka por ba biang da kaba bynrap ba lyngba kane ka prokram, ka jingmut bad ka thong ka long ban weng ïa kita ki jingeh khnang ba ki paid nongrep, kin ïoh ïa ki symbai kiba bha ha ka por kaba biang bad ha ka por kaba ki donkam.
U Myntri Rangbah u la batai ïa ki thong jong ka prokram CM Farm Plus, kaba kynthup ïa ka jingthmu ban rep haduh 10 hajar hectare ïa ki jait jingthung ba kynthup naduh u sohmrit (black pepper), cashew, dieng sisia, sohtrun, coffee bad u cocoa. U la pyntip ruh ba ka sorkar jylla ka la mang haduh 300 klur tyngka halor kane ka bynta ryngkat ka thong ban sam ïa ki symbai sha manla ki shnong.
U Conrad u la ïathuh ruh ba ka jingmut kaba jngai jong kane ka prokram ka long ban ai jingmyntoi kaba neh slem ïa ki nongrep hadien ynda ka wat kaba nyngkong ka la kut bad yn sdang thymmai biang ha ki lai ne san snem kiban sa wan lane ban pynïar shuh shuh katkum ka jingjop ka jong ka.
Ha kane ka sngi, u Conrad u la pynbna ruh ïa ki jingthmu jong ka sorkar ban tei ïa ka Ginger Processing Plant lane ka jaka ban thaw jingpynmih na u Sying ha ka shnong Bhoirymbong, ha kaba u la khot bad kyntu ruh ïa ki paid nongrep ka jylla ba kin mih shakhmat ban ai jingmut sha ka sorkar halor kiwei kiwei de ki mar rep kiban ai jingmyntoi ïa ki.
