Shillong, Nailar 11
Ki shipai BSF (Meghalaya Frontier) ha ka Sngi U Blei ki la ïathuh ba ma ki ryngkat bad ki pulit ka jylla ki la ïoh kem ïa hynñiew ngut ki nong Bangladesh ha ryngkat bad ar ngut ki nongïarap jong ki kiba dei ki nong India ha kawei na ki jaka khappud ha ka Sngi Saitjaiñ.
Ha u kyrwoh khubor ba la phah mynta ka sngi, ki BSF ki la ong ba namar ka jinglong-jingman ha Bangladesh, na ka liang jong ki, ki la pynkhlaiñ ïa ka jingap pahara ha khappud bad ki la shim ruh ïa ki sienjam bapher-bapher ban ïada na ka jingwan rung be-aiñ jong ki briew na sha shiliang u khappud.
Na ka liang ki BSF ki khlem ïathuh na kaei ka jaka ki la ïoh kem ïa kitei ki nong Bangladesh bad ki nong India, hynrei ki la pyntip ba la aiti ïa ki sha ki pulit ba kin leh ïa kaba donkam.
