Shillong, Nailar 11
Ka Thrang Hok Rangad Academic Society (THRAS) ha ryngkat ka jingïatreilang jong ka Sankardev College, Shillong bad ka Shillong Quizzing Society ka la pynlong ïa ka jingïakob kyntip ha ka 9 tarik Nailar 2024 ha Sankardev College Auditorium.
Ha kane ka sngi, ka Dr. Eureka F. P Lyngdoh, Principal ka Sankardev College ka la long kum ka kongsan. Haba ai jingkren ka la ai ka jingïaroh shikatdei eh ïa kane ka Society kaba la trei shitrhem bad ha kajuh ka por ka la ai mynsiem ïa ki khynnah, samla pule ba ki dei ban ïashimbynta ha kum kine ki jingïakob khnang ba kan tei bad pynïar ïa ka pyrkhat ka pyrdaiñ jong ki. Ka la ban jur ruh halor ka phang ban pynsuh sieng bad pynneh pynsah ïa ka nam ka burom jong ka sor Shillong kaba ju long kum u klongsnam ha ka liang ka pule puthi.
Baroh ki skul kiba la wan shim bynta ki long haduh 10 tylli. Kine ki skul ki dei kiba hap hapoh Laban bad sawdong jong ka.
Ïa ka kyrdan banyngkong la ïoh rah da ka Laban Assamese Girls’ Higher Secondary School, ba-ar da ka Pine Mount School bad balai da ka Sankardev College Higher Secondary Section.
Ïa ka prokram la sdang da ka jingkren pdiang na ka nongpynïaid jong kane ka prokram ka Kong Ainame Phanbuh. La ïoh ruh ka jingkren na u Bah Banlumlang Blah uba dei President jong ka THRAS. U Bah Blah u la kren shai halor ka nongrim bad ki jingnoh synñiang jong u Bah Thrang Hok (Bam Kwai ha Dwar U Blei) uba la long teng kum u Myntri bad MLA barim jong ka Laban.
Katba, u Bah Melam K Rangad pat uba long Secretary jong kane ka Society, u la kren halor ka thong bad ka jingthmu jong kane ka Society bad ïa ka jingkren ai-khublei pat la pynkut da ka jingkren na ka Kong Amy Smith Rangad.
Ïa kane ka jingïakob kyntip la pynïaid da u Anirban Paul bad u Arpit Nayak, kiba long ki dkhot jong ka Shillong Quizzing Society.
