Jowai, Nailar 11
Ki Rangbah Shnong na kylleng ka Bri U Hynñiewtrep ki la seng ïa kawei ka kynhun kaba la jer kyrteng ka ‘Joint Action Committee (JAC) Ki Rangbah Shnong ka Bri U Hynñiewtrep Rural Area’ ha ka jingïalang kaba la long ha Umïam, Ri-Bhoi ha ka Sngi Saitjaiñ.
U Chairman ka JAC Bah A. Lipon u la ïathuh ba ka jingthmu jong kane ka JAC ka long ban tem bad rat dyngkhong ïa ka jingtlot treikam ki skhim sorkar naduh ka jingpyllait ïa ka bainong, ki tiar ki tar bad jinglut jingsep jong ka MNREGS, ka jingsam bam ha ki Anganwadi Centre, ka jingeh ha ki khappud kum ha Block-1 bad Block-II bad kumjuh ha ki jaka khappud Bangladesh bad ka India.
Nalorkata, u la ïathuh ba kane ka JAC ka thmu ban weng ïa ka jingeh jong ki paidbah naduh ki surok, ki lynti-syngkien, ki jaka sumar kiba ki paidbah nongshong shnong ki mad na ka por sha ka por nalor kiwei kiwei ki jingeh.
Ha kane ka jingïalang, la jied Chairman ïa u Bah Arminius Lipon uba dei u President jong ka Synjuk Waheh Shnong Ri Jaiñtia bad Waheh Shnong Pynthorlangteiñ, West Jaiñtia Hills, bad General Secretary ïa u Bah Cleophas Bankerlang Syiem uba dei u Rangbah Shnong jong ka Umbuda (Ri-Bhoi).
La jied ruh ïa ar ngut ki Vice Chairman ba kynthup ïa u Bah Banbuhai Makdoh uba dei u Chairman jong ka Synjuk Rangbah Shnong Ri-Bhoi bad Rangbah Shnong jong ka Mawrong bad ïa u Bah Rangsan Sohmat uba dei u Chairman jong ka Synjuk Ki Nongsynshar Shnong ka Bri U Hynñiewtrep, Mawsynram Zone, East Khasi Hills District bad la jied Joint Secretary ïa u Bah Tellme Phawa uba dei u Waheh Shnong jong ka Sabahmuswang, West Jaiñtia Hills.
Ki dkhot ka Executive Committee jong ka JAC ki kynthup ïa u Bah Besterfield Shylla, Rangbah Shnong Pillangkata, Bah Vicky Syngkli, Rangbah Shnong Ïewmawlong (Ri-Bhoi), Bah Henry Nongrum, Rangbah Shnong Shakoikuna (Ri-Bhoi), Bah Bishar Shylla dkhot ka Synjuk Waheh Shnong Ri Jaiñtia, Bah J. Ramshon, Rangbah Shnong Mawlyndep (Ri-Bhoi), Bah Reibor Makri, Rangbah Shnong Mawkhan (Ri-Bhoi), Bah Chanbha Chullet Secretary Shnong Pillangkata, Bah Armstrong L. Thongni Mawsynram East Khasi District, Bah Pynshailang Rapmai Rangbah Shnong Nongtrai bad kiwei kiwei ki rangbah.
