Mawkyrwat, Nailar:
Ka Seng Samla Shiliang Um Zone kawei na ki seng trei mon sngewbha jong ka dong ka thiañ Mawkyrwat ka la pynrem jur ïa uwei u rangbah ba la palat 50 snem halor ka jingkynnoh ba u la thmu thombor ïa kawei heprit kaba dang 11 snem ka rta ha kine ki taïew ba la dep.
Haba kren sha ki lad pathai khubor, u Bah Wallam Nongsiej, Chairman ka Synjuk Seng Samla Shnong Shilliang Um Zone bad u Bah Moonlyroy Lyngdoh, Secretary ki la pynpaw ka jingsngewdiaw kaba khraw halor katei ka jingjia bad ki la ïathuh ruh ba na ka liang ki bahaïing hasem jong katei ka heprit ki la leit ban ujor da ka ejahar ha thanat Mawkyrwat.
Ka synjuk ka ai ka jingkhublei ïa ka tnat pulit kaba la shimkhia halor kane ka bynta. Ka kyntu ruh ïa ki paidbah ba kim dei ban shu sngap lada don kum kine ki jingjia kim dei ban sngewtieng ne buhrieh hynrei ki dei ban wan shakhmat ban ïathuh khnang ba kum kitei ki jingjia kin ym jia shuh bad ban rat dyngkhong ïa ki kam sniew.
