Jowai, Nailar:
Kum shi bynta ka jinglehkmen ïa ka 78th Independence Day Celebration ka ban long ha ka 15 tarik Nailar, ka Loomkyrwiang Dorbar Shnong da ka jingshimkhia ka Social Committee bad ka Khynroo Khyllood Committee ha ka 10 tarik Nailar ki la pynlong da ka Awareness Cum Cleaning Drive Programme bad ka jingïakob Drawing Painting Competition.
Ïa ka jingïalang la pynïaid da Ma u Daioolang Pakma, Assistant Waheh Shnong, la ïoh ki kyntien kyntu kynpham na u Ma Lammat-OO Laloo, ka jingkren shaphang ka jingkhuid katkum ka thong jong Swachh Bharat Mission la pynsngew da u Ma S.D. Laloo, General Secretary LDC bad u Ma Chibor Najiar, Adviser LDC uba dei ruh u ophisar ka tnad PHE ka Sorkar jylla.
U Ma Chibor Najiar ha ka jingkren u la ong, ka jingkhuid naduh na ïing haduh habar ka long kaba donkam bha namar mynta ki sngi ki khniang jingpang ba bunjait ki la mih ha ki dur ki rukom bapher-bapher da kaba ai nuksa ruh ïa ka ‘Dengue Fever’ kawei na ki jingpang kaba mih na ka jingshah dait ha ki pyrjong.
Ym myntoi ban ïoh ïa ka spah pyrthei lada ym ïoh ïa ka koit ka khiah, la ong shuh shuh u Ma Najiar bad kyntu jur ïa baroh ki nongshong shnong ka Loomkyrwiang ban kheiñ kor ïa ka jingkhuid jingsuba bad ka koit ka khiah bad ban ïatreilang bad ka Dorbar shnong ha kino-kino ki por ba ka dorbar shnong ka thmu ban leh na ka bynta ka bha ka miat jong ka shnong ka thaw.
Khatduh ka Kong Heiioomitre Pakma, Secretary Social Committee ha ka thong jong ka Swachh Bharat Mission ne Clean India Campaign ka la ïalam ban pule ïa ka Swachh Bharat Pledge.
