Shillong, Nailar:
U Myntri ki kam jngohkai pyrthei ka Sorkar Jylla, Bah Paul Lyngdoh u la ong ba namar ka jingdon ka jingshah pynsangeh bad ka jingshah pyndik ki nongwan jngoh kai pyrthei shapoh ka Jylla kiba thmu ban leit sha ki thaiñ Sohra bad Dawki ha ki sngi kiba la dep, ka la ktah shikatdei eh ïa ka kamai kajih jong ki briew kiba don ïa ki jaka sah ne ki ‘Hotel’ bad ki ‘Homestays’ hapoh ka Jylla namar ka jingwan duna eh ki nongwan jngoh kai pyrthei.
Haba ai jingkren ha kawei na ki jingïalang plie paidbah jong ka tnad Social Welfare ïa ka ‘Half Way Home’ bad ka kali kit nongpang ha Sawmer Dong Pynthor, Upper Shillong, ha ka 9 tarik u Nailar 2024, u Bah Paul, u la ong ba kino-kino ki jingleh kiba ngi leh ngi dei ban da pyrkhat sani bha da ki phew hajar sien hashwa ba ngin shim ïa kano-kano ka rai namar lada ngi leh ïa kano-kano ka kam, kan ktah ïa ka imlang-sahlang la ka long ka kam kaba bha ne ka kam kaba sniew.
Kum ban shu kdew hangne, na ka liang ka Hynñiewtrep National Youth Front (HNYF) East Khasi Hills District, ha ka 26 tarik u Naitung 2024, ka la leit ban bat bad pynsangeh ïa ki kali kamai Tourist ha Umtyngar kum ka dak ban dawa na ka Sorkar Jylla ba ka dei ban tehlakam ïa ki kali kamai ‘Tourist’ kiba wan nabar ka jylla ban kamai sahuh hapoh kane ka Jylla. Halor kane na ka liang u Bah Paul u la ong ba ki don ki briew kiba kam ïalade ba ki mihkhmat na ka bynta ka jingmyntoi jong ka imlang-sahlang hynrei kine kijuh ki briew ki dei kiba don bynta ban pynduh ïa ka khajna ka Jylla bad ka kamai kajih ki paidbah.
“Ha kawei pat ka liang ngi don ki briew kiba kam ba ki mihkhmat ïa ka jingmyntoi jong ka imlang-sahlang kiba don ruh ka jingkitkhlieh ïa ka jingduhnong ka khajna bad ka jingduhnong ka kamai kajih”, la ong u Bah Paul.
Shuh shuh u la ong ba ki nongïalam jong ka imlang-sahlang kaba kynthup ïa uwei-pa-uwei na ki paidbah ba ki dei ban kren pyrshah ïa kino-kino ki jait jingkren kiba sniew bad ki kam kiba sniew kiba la jia baroh ha ka kyrteng jong ka ‘Ri bad ka Jaidbynriew’.
“Nga tharai ka por ka la poi ha kaba ki nongïalam jong ka imlang-sahlang bad kata ka kynthup ïa uwei-pa-uwei na phi, u dei ban kren pyrshah ïa ka jait jingkren kaba sniew bad ka kam kaba sniew kaba dang jia baroh ha ka kyrteng jong ka Ri bad ka Jaidbynriew”, la bynrap u Bah Paul.
