Shillong, Nailar 12
Ka Myntri kaba peit ïa ka tnat ka koit ka khiah, ka Kong Ampareen Lyngdoh ka la ïathuh ba ki don palat 400 ngut ki khynnah bad khunlung kiba ïoh ïa ka jingpang HIV/AIDS, bad kane ka Myntri ka don ka jingsngewkhia namar ki don ki briew ki bym treh ban leit phah peit bniah ïalade ban lap ïa ki jait jingpang jingshitom kiba don ha ka met.
Ka Kong Ampareen ka la ïathuh ïa kane ha ka International Youth Day ha kaba la pyllait ïa ka Intensified IEC ha ka jingïalang kaba la pynlong ha U Soso Tham Auditorium ha State Central Library ha ka Lah Sngi U Blei.
Haba ai jingkren ha kane ka sngi, ka Kong Ampareen ka la ong ba ka long kaba donkam ïa ki nongshong shnong ban wan shakhmat ban kyrshan bad ïatreilang bad ka Sorkar ha kane ka jing-ïalap pyrshah ban ïakhun ïa ka jingpang HIV.
Kane ka jingïalap ban ïakhun pyrshah ïa ka jingpang kan long ha baroh ki district. Ka jingthmu jong kane ka long ban kham ai shuh shuh ka jingtip jingsngewthuh sha kane ka jingpang Human Immunodeficiency Virus (HIV) bad ka jingpang Sexually Transmitted Infections (STIs).
Ka thong jong ka jingïalap ka long ban poi sha kylleng ki jaka jong ka Jylla khamtam eh ki samla ban ai jingbatai ïa ki shaphang ka HIV bad STI.
Kane ka jingïalap ka dei ruh shibynta na ki sienjam jong ka Meghalaya Aids Control Society (MACS) ban ïada na ka jingsaphriang ka HIV bad ban kham tip kham sngewthuh shuh shaphang kane ka jingpang.
Ka Kong Ampareen ka la ong ba ka Sorkar Jylla ka la pyrshang ki lad ki lynti ban ïarap ïa kito kiba don ha ka khim ban ïasyllok bad ki bad ba kin wan shakhmat ban phah peit bniah ïalade.
Ha kane ka International Youth Day, kiba wan ban ïashimbynta ki la ïaid paidbah na phyllaw ka State Central Library sha Khyndai Lad, IGP bad pynkut ha State Central Library halor ka phang, “From Clicks to Progress: Youth Digital Pathways for Sustainable Development” ha kaba ki ophisar kynthup ïa ka Director of Health Services (MI), Dr. F.V. Kharshiing bad MACS Project Director, Dr Bethabara Decruse, ki khynnah skul bad kolej ki la donlang ha kane ka sngi.
