Calais, Nailar:
2 ngut ki phetwir ki la khlad noh ha ka Sngi U Blei katba ki dang pyrshang ban leit rung na khappud jong ka France da ka lieng na Britain lyngba ka duriaw kaba sha ka phang Shathei jong kane ka ri.
Da ka jingdon jong kine 2 ngut kiba khlad thymmai ha katei ka sngi, ka la kyntiew ia ka jingdon jong kiba khlad na kum kitei ki jingjia sha ka 9 ngut tang hapoh jong une u bnai. Hynrei lada buh jingkheiñ ia baroh kiba la khlad ha kum kitei ki jingjia naduh ba sdang jong une u snem, ki la don kumba 25 ngut baroh kiba la khlad bad duh ei noh ia ka jingim tang namar ka jingpyrshang ban leit rung be-aiñ da kum kitei ki rukom.
Ka tnat pahara duriaw jong ka France, ka la iathuh ba ha katei ka sngi, ki bor pahara duriaw ki la ialeh ban leit poi noh mar-mar sha katei ka bynta ba la iohi ia katei ka lieng kaba la kylla khongpong, hynrei kim shym la lah shuh ban pyllait im ia kitei ki 2 ngut bad la pynbna iap noh ruh ia ki naduh katei ka jaka hi tang mar ia ioh sei ia ka met jong ki.
Ha u snem 2023, ki don 12 ngut ki phetwir kiba iap ei katba ki dang pyrshang ban leit rung sha Britain, da ka jingkyrmen ba kin ioh ban im ka jingim kaba thymmai bad kaba bit- ba biang ha katei kawei pat ka ri.
Namar la ong ba kitei ki phetwir kiba leit ban rung be-aiñ na khappud duriaw, kim ju phong ia ka ‘Life Jacket’ lane ka jaket ban per halor um lada hap ne kylla ka lieng.
