Shillong, Nailar 12
Sa shisien, ha ka sien kaba 3, ka University of Science and Technology Meghalaya (USTM) ka la rung ha ka thup kyrdan napdeng 200 tylli ki skulbah kiba paka tam ha India ha ka kylla ba 9 jong ka National Institutional Ranking Framework (NIRF) 2024 ïa kaba la pynbna ha ka Lah Sngi U Blei da u Myntri ka tnad pule-puthi, u Dharmendra Pradhan.
Ki jingpynbeit kyrdan kiba la pyllait man u snem ki khmih bniah bad pynrung kyrdan ïa ki shlem jingpule ba halor ka India katkum ki kyndon bapher-bapher.
Dei tang ka USTM, ka skulbah shimet napoh ka Thaiñ Shatei Lam Mihngi ka ban ïoh jaka ha kane ka thup kyrdan la lai snem kynthih mynta.
Ki bynta ha kaba kine ki shlem pule ki ïoh kyrdan ki kynthup ïa ka jinghikai, jingpule bad jingdon-jingem, jingwad jingtip, ka jinglong-jingman ha ka jingpule ‘Graduation’ nalor kiwei-kiwei.
Ka jingpynrung kyrdan mynta u snem – ka kylla ba 9 jong ka NIRF, la wanrah ïa 3 tylli ki thup kyrdan bathymmai: ‘Open Universities,’ ‘Skill Universities,’ bad ‘State-Funded Government Universities.’
U Shongknor ka AICTE, u Anil Sahasrabudhe, u la pynbna ruh ïa ki saiñdur na bynta ka tnad ban pyllait ïa ka ‘Sustainability Rankings’ naduh u snem ban wan.
Napdeng ki skulbah ha ka Thaiñ Shatei Lam Mihngi, ha ka thup kyrdan ‘Overall Category’, ka Indian Institute of Technology, Guwahati ka la ïoh ïa ka kyrdan ba 9, Gauhati University – 57,National Institute of Technology Silchar – 92.
Katba ka Assam University – Silchar, Dibrugarh University, Mizoram University bad Tezpur University ki la rung ha ki kyrdan 101-150 Rank-Band, Manipur University bad North East Hill University ki la wan hapdeng ki kyrdan 151-200.
Ka Indian Institute of Science, Bangalore ka la wan ha ka kyrdan ba ha khliehduh ha ka ‘University Category’, katba ka USTM ka la wan ha ki kyrdan hapdeng 151 haduh 200 ‘Rank-Band’ ha kane kajuh ka thup.
